«Ապագայ» շաբաթաթերթի (Կանադա) հաղորդմամբ Թեսալոնիկի ժամանակակից արվեստներին նվիրված չորրորդ բիենալեն, որն սկսվել է սեպտեմբերի 18-ին, տեւելու է մինչեւ 2014 թվի հունվարի 31-ը: Արվեստի աշխարհի 50 լավագույն անունները համախմբող կարեւոր այդ միջոցառման պատասխանատուն եւ համադրողը շվեյցարահայ Ադելինա ֆոն Ֆիրթսենբերկն է, որ մեծ հարգանք է վայելում Հունաստանում:
«Թո վիմա» թերթին տված հարցազրույցում նա անդրադարձել է իր հայկական արմատներին եւ իրեն Հունաստանին կապող առնչություններին:
Ադելինան Շվեյցարիայի քաղաքացի է: Ծնունդով պոլսեցի: Անկախ աշխատող է, զբաղվում է մարդու իրավունքների պաշտպանության հարցեր արծարծող ֆիլմերի արտադրությամբ: Նախագահն է «Art For the World» հաստատության: Մասնագիտությամբ քաղաքագետ է, բայց ուսանողական տարիներից ներգրավվել է արվեստի ոլորտում եւ ղեկավարել Գրենոբլի արվեստների դպրոցը: Գործակցել է ՄԱԿ-ի եւ այլ միջազգային կազմակերպությունների հետ եւ իր աշխատանքների համար պարգեւատրվել է Վենետիկի 45-րդ բիենալեի ընթացքում:
