Մայր աթոռ Ս. Էջմիածնի տեղեկատվական համակարգից խոր ցավով գուժում են, որ նոյեմբերի 16-ի առավոտյան կյանքի 76-րդ տարում վախճանվել է Մայր աթոռ Սուրբ Էջմիածնի երիցագույն միաբաններից Արսեն արքեպիսկոպոս Բերբերյանը:
Բազմավաստակ Սրբազան հոր վախճանը մեծ կորուստ է Հայաստանյայց առաքելական սուրբ եկեղեցու եւ նրա հավատավոր զավակների համար, կարդում ենք հաղորդագրության մեջ:
Գարեգին Բ Ամենայն հայոց կաթողիկոսը, Գերագույն հոգեւոր խորհուրդն ու Հայ եկեղեցու ողջ հոգեւորականաց դասը սգում են բարեհիշատակ Սրբազան հոր մահը:
Հանգուցյալ Սրբազանի աճյունը նոյեմբերի 18-ին` ժամը 17:30-ին դրվել է Ս. Գայանե վանքում վերջին հրաժեշտի համար, ժ. 18:00-ին կատարվել է եկեղեցու կարգ: Այսօր, նոյեմբերի 19-ին, ժ. 10:30-ին, հընթացս սբ պատարագի կկատարվի հանգուցյալ Սրբազանի վերջին օծումը, ապա հուղարկավորության արարողությունը: Արսեն Սրբազանի մարմինը կամփոփվի Մայր աթոռի միաբանական գերեզմանատանը:
Արսեն արքեպիսկոպոս Բերբերյանը եղել է Գերագույն հոգեւոր խորհրդի անդամ, Եկեղեցիների համաշխարհային խորհրդի կենտրոնական կոմիտեի անդամ, Շվեդիայի եկեղեցիների էկումենիկ խորհրդի նախագահ, մասնակցել է միջազգային բազմաթիվ ժողովների: Արսեն Սրբազանը հեղինակ է բազմաթիվ ուսումնասիրությունների, պատմական ու երաժշտական դասագրքերի, հրապարակախոսական հոդվածների եւ այլ աշխատությունների, հոգեւոր երգերի ու շարականների ձայնապնակների ու ձայնագրությունների:
Յիշատակն արդարոյն օրհնութեամբ եղիցի:
