ԱՄՆ-ի զինված ուժերը մի քանի տարի օգտվել են նյութատեխնիկական ապահովման ծրագրերի ընդօրինակված պատճեններից: Այդ գողացված պատճեններն օգտագործվել են ռազմական առաքելությունների ժամանակ զինվորների տեղաշարժման անվտանգ երթուղիների ստեղծման համար: Ծրագրային ապահովման հեղինակներն այժմ պահանջում են փոխհատուցել իրենց վնասները, որոնք գնահատվում են գրեթե քառորդ միլիարդ դոլար:
Վերջին տարիներին ԱՄՆ-ի կառավարությունը ինչպես երկրի ներսում, այնպես էլ ուրիշ պետություններում ակտիվորեն պայքարում է բանագողության եւ պատճենումների դեմ: TorrentFreak կայքէջը հիշեցնում է փոխնախագահ Ջո Բայդենի խոսքերը, որը ընդօրինակումը համարում է «գողություն» եւ նորանոր միջոցներ է ձեռնարկում բանագողության դեմ պայքարելու համար:
Սակայն պարզվում է, որ Apptricity ընկերությունը ստիպված դատի է տվել հենց ԱՄՆ-ի կառավարությանը, իշխանություններին մեղադրելով ընկերության ծրագրային արտադրանքների անօրինական օգտագործման մեջ: 2004 թվականին Apptricity-ն պայմանագիր էր ստորագրել բանակի հետ, վաճառելով ծրագրային այն արտադրանքների արտոնագիրը, որոնք ապահովում են զորքերի տեղաշարժման հաշվարկները: Գործարքի արդյունքների համաձայն, զինվորականները կարող էին ծրագիրն օգտագործել 150 համակարգիչների վրա:
Ձեռք բերված ծրագիրն օգտագործվել է բազմաթիվ ռազմական գործողություններում, երկրաշարժերի եւ այլ աղետների ժամանակ: Ինչպես պարզվում է, զինվորականներն իրենց աշխատանքում չեն սահմանափակվել 150 համակարգիչներով. նրանք չարտոնված պատճեններ են տեղադրել հազարավոր մեքենաների վրա:
Ըստ էության «բանագողային» ծրագրային ապահովումը հայտնաբերվել է 93 սերվերի եւ 9000 համակարգչի վրա: Նկատի առնելով, որ ընկերության գնացուցակով սերվերի վրա ծրագրային ապահովման տեղակայման արժեքը 1,35 մլն դոլար է, իսկ համակարգչի վրաՙ 5 հազար դոլար, Apptricity-ն ԱՄՆ-ի կառավարության գործողությունների հետեւանքով իր կրած կորուստները գնահատել է 224 մլն դոլար:
Կառավարությունը խոստովանել է, որ առանց թույլտվության տեղադրել է ծրագրի բազմաթիվ պատճեններ: Երկարատեւ բանակցություններից հետո երկու կողմերը հանգել են համաձայնության, ըստ որի պետությունը Apptricity-ին կվճարի 50 մլն դոլար: Չնայած տհաճ միջադեպին, Apptricity-ն մտադիր է շարունակել համագործակցությունն ամերիկացի զինվորականների հետ: Նախագահ Բարաք Օբամայի վարչակազմը առայժմ չի մեկնաբանել միջադեպը:
