«Ալ Ջազիրա» հեռուստաալիքը Հայոց ցեղասպանության փաստը լուսաբանող ֆիլմ է ցուցադրել: Ինչպես հաղորդում է «Արմենպրես»-ը, ֆիլմում խոսվել է նաեւ այն մասին, որ ԱՄՆ կողմից Հայոց ցեղասպանության ճանաչմանը խոչընդոտելու համար Թուրքիան աշխատում է օգտագործել Միացյալ Նահանգներում գտնվող հրեական լոբբին:
Հեռուստաալիքը նշել է, որ Հայոց ցեղասպանության ճանաչման հարցը քննարկվել է Իսրայելի խորհրդարանում, սակայն այդ հարցում դեռ վերջնական որոշում չի ընդունվել: «Ալ Ջազիրա»-ն ընդգծում է, որ չնայած Հայոց ցեղասպանության ճանաչման հարցում Իսրայելում հայկական համայնքի լոբբիստական գործողություններին, իսրայելական կառավարությունը չի ցանկանում ավելի վատացնել հարաբերությունները Թուրքիայի հետ:
«Անհամաձայնություն Միջերկրական ծովում» կոչված ֆիլմում «Ալ Ջազիրա»-ն անդրադարձել է նաեւ թուրք-իսրայելական վատթարացած կապերին, Իսրայել-Պաղեստին հակամարտությանը, Գազայում տեղի ունեցած զարգացումներին, Միջերկրական ծովում հույների` բնական գազի մեծ պաշարներ հայտնաբերելու հարցին, Իսրայելի ու Կիպրոսի միջեւ առեւտրային եւ Ադրբեջանի հետ Իսրայելի ռազմավարական հարաբերություններին:
