2020-ի աղետաբեր պատերազմից հետո Փաշինյանի հրաժարականի պահանջով երկու անգամ փողոց դուրս եկած ու ամիսներ ձգվող պայքար մղած ընդդիմադիրները վարչապետից կաշկանդվում են: Խորհրդարանական «Հայաստան» ու «Պատիվ ունեմ» խմբակցության պատգամավորներն այս մտքին խիստ անհամաձայն կլինեն ու հնարավոր բոլոր ձեւերով կփորձեն հակառակում համոզել, բայց վարչապետի մասնակցությամբ որեւէ միջոցառման, քննարկման, նիստի չներկայանալը հաստատում է մտահոգություն-համոզումս:
«44-օրյա պատերազմի հանգամանքներն ուսումնասիրող» քննիչ հանձնաժողովի հերթական նիստին, ինչին մասնակցում էր վարչապետ Փաշինյանը, ընդդիմադիրները չէին ներկայացել՝ պատճառաբանելով, թե «շոուի մասնակից» չեն դառնա:
Նախորդ տարի այս օրերին Երեւանի փողոցներում «սիթի-տուր» անող ընդդիմադիր երեսփոխանները, որ ամիսներ անց նորից վերադարձան ու նստեցին լիագումար նիստերի դահլիճում իրենց հատկացված աթոռներին, անհասկանալի ձեւով են մասնակցում խորհրդարանական աշխատանքներին: Քանի կար՝ իրենց՝ գործուղում մեկնող ընդդիմադիր գործընկերներին էին անարգանքի սյանը գամում, հիմա բացառապես բոլորը բաց չեն թողնում անգամ Կրասնոդար գործուղվելու շանսը: Թեեւ վարչապետի մասնակցությամբ հանձնաժողովի աշխատանքներին, նիստերին կամ տարատեսակ այլ նիստերից բացակայում են, բայց քննարկում են, օրինակ, գործադրի ներկայացրած «Ակցիզային հարկի» մասին օրենքի նախագիծը: Ի՞նչ է ստացվում՝ նրանց համար Փաշինյանի կաբինետի ներկայացրած օրենսդրական փաթեթը շոու չէ, բայց Փաշինյանի ելույթը շոու է:
Ընդդիմության արդարացումը, ինչ-որ տեղ, գուցե ընկալելի լիներ, եթե առանձին պատգաավորներ ու քաղաքական թիմի անդամներ Facebook սոցիալական ցանցում չհակադարձեին Փաշինյանին ու նրա հայտարարություններին: Բայց եթե ինչ-որ ձեւով՝ հեռավար, թե ֆիզիկական ներկայություն ապահովելով, մեկնաբանում են «շոու անողի» ասածները, նշանակում է ընդունել նրա առաջ բերած օրակարգն ու «շոուի» մասնակիցը դառնալ:
Ընդդիմադիրներն, ի դեպ, խուսափում են նաեւ Ազգային ժողով-կառավարություն հարցուպատասխանից, գուցե այն պատճառով, որ Փաշինյանը հերթական անգամ հիշելու է «նախկիններին»՝ իրենց մի մասին, մունաթ գա, մատ թափ տա… Կարճ ասած՝ տված հարցից «քոռուփոշման» չմնալու համար «Հայաստան» եւ «Պատիվ ունեմ» խմբակցության պատգամավորները նախընտրում են ո՛չ հարց տալ, ո՛չ էլ պատասխան լսել: Սա, անխոս, ոչ այլ ինչ է, քան ուղիղ հարցեր տալուց ու պատասխաններ լսելուց խուսափել: Իսկ եթե ինչ-որ բանից խուսափում են, նշանակում է՝ կաշկադվում կամ վախենում են:
Ի դեպ, հայրենի «ուլտրաընդդիմադիրներն» իրենց նախորդներին՝ ԱԺ 7-րդ գումարման ընդդիմադիր «Բարգավաճ Հայաստան» ու «Լուսավոր Հայաստան» խմբակցությունների ներկայացուցիչներին մեղադրում էին, թե «ինչպե՞ս է կարելի է ՔՊ-ականների հետ նույն դահլիճում գտնվել»: Այժմ սակայն նրանք ոչ միայն նստում են միեւնույն դահլիճում, այլեւ միասին գործուղումների են մեկնում ու կողք կողքի կանգնած՝ ժպտադեմ լուսանկարներ անում եւ հրապարակում:
ՍԵՎԱԿ ՎԱՐԴՈՒՄՅԱՆ
