Դեկտեմբերի 19-ի կեսօրին Մոսկվայումՙ Միջազգային առեւտրի կենտրոնում, սկսվել է ՌԴ նախագահ Վլադիմիր Պուտինի ամենամյա «մեծ» եւ երկարատեւ մամլո ասուլիսը, որի ընթացքում նա պատասխանել է ամեն տեսակ հարցերի: Դահլիճ մտնելով եւ լրագրողներին ողջունելովՙ նախագահն անմիջապես անդրադարձել է Ռուսաստանի վերջին մեկ տարվա տնտեսական ցուցանիշներին, հաղորդում է «Ինտերֆաքս» գործակալությունը: Պուտինը նշել է, որ 2013-ին երկրի ՀՆԱ աճը կազմել է 1,4-1,5 տոկոս: Սղաճը մինչեւ տարեվերջ կկազմի 6,1 տոկոսՙ անցյալ տարվա 6,6-ի դիմաց:
Ուկրաինական «Ունիան» գործակալության թղթակիցը Պուտինին հարցրել է. «Ռուսաստանը որքա՞ն կվճարեր Ուկրաինային, որպեսզի վերջինս չնայի Եվրոպայի կողմը»: ՌԴ նախագահն ասել է, որ Ուկրաինային Ռուսաստանի ցուցաբերած հսկայական օգնությունը թելադրվում է եղբայրական երկրի ու հիմնական գործընկերոջ ներկայիս ֆինանսական ու քաղաքական ծանր վիճակով:
«Հավատացնում եմ ձեզ, որ դա ամենագլխավոր պատճառն է, որը մեզ դրդեց ընդունել այդ որոշումը», նշել է Պուտինը:
Նախագահը ընդգծել է, որ Ուկրաինային հատկացվող օգնությունըՙ 15 մլրդ դոլարի վարկը, բնավ կապված չէ կիեւյան Մայդանի իրադարձությունների եւ Ուկրաինա-Եվրոմիություն բանակցությունների հետ: Ըստ Պուտինիՙ Ռուսաստանը դեմ չէ Եվրոպայի հետ Ուկրաինայի ասոցիացմանը, սակայն կպաշտպանի սեփական շուկան:
Պուտինը հիշեցրել է, որ «Գազպրոմը» անցյալում եւս քանիցս իջեցրել էր Ուկրաինային մատակարարվող գազի գները:
