Ռուբեն Հախվերդյանը գնացել էր Գագիկ Ծառուկյանի մոտ: Կամ Ծառուկյանն էր կանչել նրան, կարեւոր չէ, կարեւորն այն է, որ Գագիկ Ծառուկյանը ընդունել էր Ռուբեն Հախվերդյանին: Բազմաթիվ քաղաքացիներ երազում են, որ իրենց ընդունի Ծառուկյանը` միեւնույն հարցով: Ռուբեն Հախվերդյանին ընդունել էր, սա, որպեսզի հասկանալի լինի, թե ինչ է նշանակում հանդիպել Գագիկ Ծառուկյանին:
Զրուցել են, ավելի ճիշտ` Գագիկ Ծառուկյանը խոսել է, Հախվերդյանը` կամ ժպտացել, կամ շնորհակալություն հայտնել, կամ էլ` ժպիտով շնորհակալություն հայտնել: Հետո Հախվերդյանը պետք է էլի երգեր գրի, նրան էլի պետք է լսենք, ինչպես լսում էինք, երբ Հախվերդյանը Րաֆֆիի Հովհաննիսյանի հետ` Ազատության հրապարակում էր, օրինակ: Հախվերդյանը ապաքաղաքական կերպար է, իսկական քաղաքացի: Ծառուկյանն էլ: Ու Հախվերդյանը գնացել էր Ծառուկյանի մոտ, որպեսզի վերջինս օգնի իրեն, քանի որ Ռուբեն Հախվերդյանը օգնության կարիք ունի: Ծառուկյանի մոտ դրա համար են գնում, անգամ Լեւոն Տեր-Պետրոսյանը:
«Հետեւում եմ Ձեր երգերին, որը դա ոչ թե միայն ես, իմ համարա հաճելի, այլ տեսնելով իմ ընտանիքը, երեխաները, հանրությունը, իրոք, շատ լավա ընդունում Ձեր երաժշտությունը: Ու էսօր քանի որ չէ թուրքական ու արաբականը, այլ մեր տեղականը, որ տեսնելով ողջունում եմ: …Դրա համար, եթե, ասեք թե, անհրաժեշտություն կա իմ մասով, որ դա ավելի զարգացնելՙ հիմա սկավառակներա, ինչա, որ հանրությանը հասանելի լինի, իմացի, որ ես պատրաստակամ եմ» (կետադրությունը` մերն է- Հ. Ա.), հանդիպման ընթացքում Հախվերդյանին ասել է Ծառուկյանը: Տեղական արտադրող երգիչը շնորհակալություն է հայտնել, նաեւ ժպտացել է:
Նախորդ օրը մեկ այլ երգիչ` Շուշան Պետրոսյանը, վիրավորել էր լրագրողին, լրագրողներին: Շուշանն ասել էր` «բոլոր լրագրողներին»: «Դուք անբարոյական եք»,- ասել էր երգչուհին: Մարդիկ կան, ովքեր հայտարարեցին, թե Շուշանը ճիշտ է ասել, մարդիկ կան, ովքեր ի պատասխան վիրավորեցին Շուշանին: Մարդիկ էլ կան, ովքեր հիշեցրեցին նրան, թե ինչ է նշանակում «հանրային դեմք» լինել, եւ, որ ինքը` Շուշանը, հենց հանրային դեմք է, հետեւաբար պետք է չվիրավորի երբեք եւ մշտապես պատրաստ լինի` վիրավորանքներ լսելուն:
Հետո Շուշանը զանգահարել ու ներողություն էր խնդրել լրագրողից, միայն մեկից, չնայած ասել էր, թե «անբարոյական եք»` բոլոր լրագրողներին: Լրագրողը, բոլոր լրագրողներից միայն մեկը, հայտարարել էր, որ իր ու երգչուհու միջեւ էլ ոչ մի հարց չկա, միջադեպը հարթված է: ԿԳ նախարար, Շուշանի համակուսակից Արմեն Աշոտյանը Ֆեյսբուքում, հայտնելով Շուշանի ներողության մասին, գրել էր` «Ապրես, Շուշան, դու ուժեղ մարդ ես»:
***
Բոլորը հանգստացան, չնայած շարունակում են անհագիստ մնալ: Քաղաքականություն չկա, որովհետեւ քաղաքականությամբ զբաղվում են ապաքաղաքական մարդիկ: Երգ չկա, որովհետեւ երգն այլեւս արտադրության պես մի բան է` թուրքական, ադրբեջանական, լավագույն դեպքում` տեղական, ինչպես թթվասերը, մածունը… Խառնվել ենք, որովհետեւ խառնված է, կամ` հակառակը, ավելի ճիշտ` հակառակը: Բարոյականությունն ու անբարոյականությունը ծիծաղելի բառեր են դարձել, որովհետեւ կարելի է մեկին, բոլորին անբարոյական անվանել, հետո` ներողություն խնդրել, եւ ներվել: Բայց փրկություն կա, եւ այն ներսից է գալու, որովհետեւ մենք ներսից ենք փչացած, բոլորս… Ներողություն:
