Ռուսաստանի նախագահի մամուլի քարտուղար Դմիտրի Պեսկովը, նկատի ունենալով Հայաստան-Ադրբեջան ներկա բանակցային գործընթացը, երկու երկրների ղեկավարների մոսկովյան հանդիպման շեմին ասել է, թե Կրեմլը կուզենար արդյունք ստանալ, բայց թե դա ինչ չափով կհաջողվի՝ «ցույց կտա ժամանակը»:
ՌԴ գիտությունների ակադեմիայի համաշխարհային տնտեսության եւ միազգային հարաբերությունների ինստիտուտի Կովկասի ենթաբաժնի գլխավոր գիտաշխատող Ալեքսանդր Կռիլովը կարծիք է հայտնել, որ «ճեղքում» դժվար թե լինի: «Հակամարտության կողմերի թիկունքում,- «ՌԻԱ նովոստի» ռուսաստանյան լրատվական գործակալության թղթակցին ասել է նա,- 30 տարիների անարդյունք բանակցություններ են: Վերջին շրջանում էլ սկզբունքորեն ոչինչ տեղի չի ունեցել: Խաղաղության համաձայնագիր կնքելու համար սահմանին նվազագույնը պետք է դադարեն փոխհրաձգությունները»,- ընդգծել է փորձագետը:
Նրա կարծիքով, նշում է գործակալությունը, անգամ Ղարաբաղն Ադրբեջանի մաս ճանաչելու Փաշինյանի պատրաստակամությունը չի մոտեցնի խնդրի լուծումը: «Ամենից առաջ դրան պետք է համաձայնեն Ստեփանակերտում: Եթե խոսքը միայն Հայաստանի միակողմանի հրաժարման մասին է հովանավորությունից, հարց է առաջանում՝ ի՞նչ է սպասում Ղարաբաղի հայերին: Նրանք չեն ցանկանում Ադրբեջանի կազմ մտնել, իսկ 2025-ին այդտեղից կարող են հեռանալ ռուսաստանցի խաղաղապահները»,- զգուշացնում է Կռիլովը:
ՌԴ Պետդումայի միջազգային գործերի կոմիտեի նախագահի տեղակալ Դմիտրի Նովիկովը, անդրադառնալով Հայաստանի վարչապետի վերջին օրերի հայտարարություններին, «Գազետա.ռու»-ի հետ զրույցում հայտարարել է , թե Փաշինյանը բարդ վիճակում է հայտնվել «տարբեր տեսակետներից՝ բարդ ներքաղաքական իրավիճակում, բարդ միջազգային իրավիճակում»:
«Կան ուժային մի քանի կենտրոններ, որոնք այժմ ազդում են Հայաստանի իրավիճակի, հայկական իշխանությունների վրա: Կա դիրքորոշում, կապված, մի կողմից, Հայաստանի համար Ռուսաստանի հետ դաշնակցային պարտավորությունները կատարելու անհրաժեշտության հետ: Մյուս կողմից, կա արեւմտյան երկրների ճնշման գործոնը, որոնք Հայաստանին սպառնում են զգալի պատժամիջոցներ կիրառել, եթե Ռուսաստանի հետ բարեկամական հարաբերությունները պահպանվեն: Այդ իրավիճակում էլ նա փորձում է հայկական կողմից կառուցել քաղաքականության մի նոր եղանակ, որը թույլ կտար կարգավորել այն լարվածությունը, որ գոյություն ունի Բաքվի ու Երեւանի հարաբերություններում»,- նկատել է ռուս խորհրդարանականը:
Նովիկովը նաեւ կարծիք է հայտնել, թե ՀԱՊԿ-ից Հայաստանի դուրս գալը չի համապատասխանում հենց Հայաստանի ազգային շահերին: Եթե Հայաստանի ներկայիս իշխանությունները հետ»õեն իրենց երկրի, իրենց ժողովրդի շահերը հարգելու անհրաժեշտությանը, ապա ՀԱՊԿ-ից դուրս գալու մասին ոչ մի խոսք լինել չի կարող, ընդգծել է ռուսաստանցի պատգամավորը:
Այս իրավիճակում, նշել է «Ռեգնում» գործակալության զրուցակիցը, Երեւանը կարող է հույս դնել Մոսկվայի եւ Թեհրանի աջակցության վրա: Վերջինիս հարցում նկատի է առնվում, որ նրա հարաբերությունները Բաքվի հետ այժմ ամենացածր մակարդակի են:
Արցախյան խնդրի հետ կապված ներկա քաղաքական մարտահրավերին մեկ այլ տեսանկյունից է նայել ռուսաստանյան «Ռեպորտյոր» ցանցային հրատարակությունը: Նրա հրապարակումը վերնագրված է «Ադրբեջանին Լեռնային Ղարաբաղի հանձնումով Ռուսաստանը կկորցնի Հայաստանը որպես ՀԱՊԿ-ի եւ ԵԱՏՄ-ի գծով գործընկերոջ»: «2023 թ. հունիսի 1-ին Քիշնեւում կարող է տեղի ունենալ Հայաստանի ու Ադրբեջանի միջեւ խաղաղության պայմանագրի պաշտոնական ստորագրումը,- ասվում է տպագրված հոդվածում:- Այդ իրադարձությունը պետք է վերջ դնի Երեւանի ու Բաքվի միջեւ տարածքային վեճերին ( ՞ – Գ. Մ.), որից հետո հավաքական Արեւմուտքին այլեւս ոչինչ չի խանգարի վերջնականապես իր բուռը հավաքել Անդրկովկասը…»:
ԳԵՂԱՄ ՄԿՐՏՉՅԱՆ
