Երեկ Գերմանիայի տարբեր քաղաքներում բացվեցին ընտրատեղամասերի դռները Թուրքիայի քաղաքացիություն ունեցող 1,5 միլիոն ընտրողների համար: Նրանք մինչեւ մայիսի 9-ը կարող են քվե տալ՝ մայիսի 14-ից հետո Էրդողանի՞ն, թե՞ Քըլըչդարօղլուին են ուզում տեսնել նախագահի գահին: Գերմանացի վերլուծաբանները նկատել են տալիս, որ թեեւ ընտրապայքարի ամենաթեժ պահին 69-ամյա նախագահ Էրդողանի ֆիզիկական տկարությունը նրան ստիպել է երեքշաբթի օրվանից ի վեր կարեւոր հանդիպումների չմասնակցել, սակայն դա կարող է քվեների զգալի պակաս գրանցել այն ժամանակ, երբ նրա վիճակն իսկապես լրջանա, հանրության հետ շփման բացակայությունը տեւական լինի: Քանի որ ընտրողը հիշում է Քըլըչդարօղլուի տարիքը՝ 74: Այն, որ Բոսֆորի ափին հիվանդ կա, վաղուց գիտենք: Ի՞նչն է հիվանդ, չգիտենք, բայց ուշագրավ է, որ այս անգամ ինքն է խոստովանում:
ԱՆԱՀԻՏ ՀՈՎՍԵՓՅԱՆ
Գերմանիա
