Կառավարությունը ավելի վաղ Ռուսաստանի Դաշնության հետ կնքած երկու վարկային համաձայնագիր է բերել Ազգային ժողով, որոնք այս շաբաթ բուռն քննարկվում էին քաղաքական ուժերի կողմից եւ վերաբերում էին Հայաստանի ատոմակայանի գործարկման ժամկետը, ատոմակայանի 2-րդ էներգոբլոկի արդիականացմամբ, եւս տասն տարով երկարաձգելու համար 270 մլն եւ 30 մլն դոլար վարկեր վերցնելուն: Ատոմակայանի գործարկման ժամկետն ավարտվում է 2016 թվականին, արդիականացման շնորհիվ ատոմակայանը էներգիա կարտադրի մինչեւ 2026 թվականը: Ասենք, որ այս վարկերի պատճառով նաեւ ատոմակայանի արտադրած էներգիայի գինը որոշ բարձրացման կգնա, սակայն անտարակուսելի է այն դրական դերը, որ խաղում է ատոմակայանը Հայաստանի էներգետիկ անվտանգության եւ ընդհանրապես` տնտեսության առումով:
Բուռն քննարկումները վեր հանեցին ե՛ւ տեխնիկատնտեսական խնդիրները, ե՛ւ քաղաքական բախումների առիթ դարձան, առանձնապես կոշտ բանավիճեցին նախկին վարչապետներ Հրանտ Բագրատյանն ու Խոսրով Հարությունյանը` մութ ու ցուրտ տարիների եւ ատոմակայանի անցած դարի իննսունական թվականներին բացել-փակելու պատճառների թեմայով: Այդ ընթացքում էներգիայի սակագնի մասին ելույթներ եւս եղան, որն, ինչպես պարզվում է, այս ամառվանից կթանակա, հասնելով մինչեւ 48 դրամի:
Զինծառայությունից խուսափած 27 տարեկանից բարձր տարիքի անձանց համար` նոր հնարավորություն
Սահմանված կարգի խախտմամբ պարտադիր զինվորական ծառայություն չանցած այն քաղաքացիները, ում տարիքը բարձր է 27-ից, ներման եւ Հայաստան վերադարձի հերթական հնարավորությունը ստացան: Այս անգամ համապատասխան օրենքի գործոությունը երկարաձգվեց` ներառելով մինչեւ 2014 թվականի դեկտեմբերի 31-ը տեղի ունեցած զորակոչից խուսափածներին: Անցած տարի այս օրենքի գործողությունից օգտվել է 938 մարդ: Հիշեցնենք` մեկ զորակոչի համար վճարը 100 հազար դրամ է, ընդհանուր վճարը կազմում է 1,8 մլն դրամ: Ընդհանուր թվով` բանակից խուսափելու համար քրեական հետապնդման մեջ է 10 հազար մարդ:
