Ինչպես վաղուց հայտնի էր ՀՀ նախագահ Սերժ Սարգսյանը մայիսի 9-ին կլինի Մոսկվայում եւ կմասնակցի նույն օրը այդ քաղաքի Կարմիր հրապարակում նշվող Հաղթանակի 70-ամյակին նվիրված շքերթին: Նկատենք, որ նախագահ Սարգսյանը Մոսկվա մեկնեց ԱՄՆ-ից, որտեղ գտնվում էր եւ մի շարք հանդիպումներ ունեցավ վերջին օրերին:
Միեւնույն ժամանակ, մայիսի 8-ին, այսօր, Մոսկվայում տեղի կունենա ԱՊՀ անդամ երկրների ղեկավարների ոչ պաշտոնաան գագաթաժողով, որին, սակայն, չեն մասնակցելու ԱՊՀ անդամ երկրներից` Մոլդովայի, Ուկրաինայի եւ Ուզբեկստանի նախագահները: Վերջիններս չեն մասնակցելու նաեւ հաղթանակի շքերթին: Ուզբեկստանի նախագահ Իսլամ Քարիմովն, ի դեպ, իր Մոսկվա չմեկնելու որոշումը հիմնավորել է հանգամանքով, որ «այդ օրը մեր երկրում Հաղթանակին նվիրված բազմաթիվ միջոցառումներ են լինելու եւ իմ մասնակցությունը դրանց պարտադիր է»:
Հիշեցնենք նաեւ, որ այդ օրը Հայաստանում տեղի են ունենալու ոչ միայն Երկրորդ աշխարհամարտում տարած Հաղթանակի, այլեւ Շուշիի ազատագրմանը նվիրված միջոցառումներ:
Ի դեպ, Թուրքիայի եւ Հյուսիսային Կորեայի ղեկավարները եւս մերժել են Պուտինի հրավերքը` մայիսի 9-ին միասին տոնելու Հաղթանակը: Էրդողանը` գիտենք ինչու չի գալու, չգիտենք, թե ինչո՞ւ է հրավիրվել հյուսիսկորեացի առաջնորդը:
