ՈՒՐԻՇ ՑԱՆԿԱՑՈՂՆԵՐ ՉԿԱ՞Ն
Գերմանիայի ԱԳ նախարար Ֆրանկ-Վալտեր Շտայնմայերը, ստանձնելով ԵԱՀԿ-ում նախագահությունը, հայտարարել է, որ Գերմանիան մտադիր է ամրապնդել ԵԱՀԿ-ի հնարավորությունները հակամարտությունների լուծման հարցում: «Մենք նաեւ մասնակցելու են Լեռնային Ղարաբաղում, Մերձդնեստրում եւ Հարավային Կովկասում հակամարտությունների լուծմանն եւ ակտիվացնելու ենք ԵԱՀԿ առաքելությունները»:
Նախարար Շտայնմայերը չի մանրամասնել, թե այդ Գերմանիա՞ն է մասնակցելու կոնկրետ ԼՂ հակամարտության լուծմանը, թե՞ ԵԱՀԿ-ն:
Զուգահեռաբար ԵԱՀԿ Մինսկի խմբի ամերիկացի համանախագահող Ջեյմս Ուորլիքը Լոնդոնում հանդիպում է ունեցել Մեծ Բրիտանիայի Եվրոպական հարցերով նախարար Դեւիդ Լիդինգթոնի հետ: Զրուցակիցները քննարկել են Լեռնային Ղարաբաղի հակամարտությունը: Ապա Ուորլիքը Twitter-ի իր էջում հանդիպման մասին գրել է. «Քննարկումը հաջող ընթացավ»:
Տրամաբանում ենք, որ այսուհետ ոչ միայն Գերմանիան, այլեւ Մեծ Բրիտանիան եւս մասնակցելու է ԼՂ հակամարտության լուծում գտնելու գործընթացին: Մնում է միայն, որ այդ գործընթացին մասնակցի նաեւ Ադրբեջանը: Ի դեպ, ուրիշ ցանկացողներ չկա՞ն: Պորտուգալիա, դո՛ւ ի՞նչ կասես…
