Հունվարի 20-ին Ռամկավար Ազատական կուսակցության ատենապետ, «Ազգ» թերթի գլխավոր խմբագիր Հակոբ Ավետիքյանը հանդիպում է ունեցել Հայաստանում Սիրիայի Հանրապետության հավատարմատար պրն Մոհամմադ Իսսամ Նայյալի հետ, վերջինիս հրավերով: Ավելի քան մեկ ժամ տեւած զրույցի ընթացքում արծարծվել են փոխադարձ հետաքրքրություն ներկայացնող բազմաթիվ հարցեր, ինչպեսՙ սիրիական տագնապի ներկա վիճակըՙ հատկապես ռուսաստանյան ռազմաքաղաքական միջամտությունից հետո, տարածաշրջանում քաղաքատնտեսական փոփոխությունների հեռանկարը Իրանի նկատմամբ պատժամիջոցների մասնակի վերացման պայմաններում, Թուրքիայի թշնամական նկրտումների ձախողումը սիրիական պետության ու ժողովրդի միահամուռ ջանքերով, քրդական գործոնի դերակատարությունը ողջ տարածաշրջանում, ինչպես նաեւ պաշտոնական Դամասկոսի ազդու ջանքերը ահաբեկչության դեմ պայքարի գործում: Բնականաբար անդրադարձ է եղել նաեւ հայ-սիրիական հարաբերություններին, Հայաստանում ապաստան գտած սիրիահայերի վիճակին: Պրն Մոհամմադ Իսսամ Նայյալը շատ բարձր է գնահատել Հայաստանի իշխանությունների ու քաղաքացիների հոգատար վերաբերմունքը սիրիահայերի նկատմամբ, իսկ Հ. Ավետիքյանը գոհունակությամբ ընդգծել է նրանց աշխատասիրությունը, նախաձեռնողական ոգին եւ տոկունությունը, որը դարձել է գլխավոր գրավականը հայաստանյան աշխատաշուկայում նրանց վայելած մեծ վստահության:
Զրուցակիցները խոստացել են պարբերական դարձնել իրեն խորհրդակցությունները:
