ԱԴՐԲԵՋԱՆՑԻ ԼՐԱԳՐՈՂՆԵՐԻ ՊԱՀԱՆՋՈՎ ԳԵՂԱՄՅԱՆԻ ԳՐՔԵՐԸ ՀԱՎԱՔԵ՞Լ ԵՆ

Անահիտ Հովսեփյան, Գերմանիա

Վերջին շրջանում նկատելի է, որ նույնիսկ հայրենի հեռուստատեսությունն է գումարներ խնայումՙ սեփական թղթակիցներին կարեւոր գործուղումներից զերծ պահելով։ Այդպես էլ լրագրողական այլընտրանքային աղբյուր չգտանք, որ կլուսաբաներ, թե իրականում ադրբեջանցի լրագրողներըՙ AzTV- ի եւ «Ազերթաջի» տեղական թղթակիցները հայկական կողմի «ինչ սադրանք են կանխել», ինչպես ծանուցում է հուլիսի 1- ին «Ազերթաջի» գերմաներեն, անգլերեն տարբերակում տեղակայված լուրը։ Թբիլիսիում հուլիսի 1- ին գումարված ԵԱՀԿ խորհրդարանական վեհաժողովի ժամանակ, ըստ մեր հիշատակած աղբյուրի, նիստերի դահլիճում սեղանի տակ Ղարաբաղի մասին հայերեն հրատարակություններ են նկատել եւ պահանջել են դրանք սրահից հեռացնել, քանի որ, ըստ ադրբեջանցի լրագրողների պնդմանՙ ապրիլյան պատերազմի մասին «կեղծ տեղեկատվություն են պարունակել»։ Ադրբեջանական պետական լրատվամիջոցը ծանուցում է, թե ԵԱՀԿ խորհրդարանական վեհաժողովի միջազգային կապերի բաժնի ղեկավար Բո Նիլսենի միջամտությունից հետո գրքերը դուրս են տարվել։ Տեղեկատվությանը կցված լուսանկարը, որ տպագրում ենք ստորեւ, փաստում է, որ խոսքը Արտաշես Գեղամյանի գրքի մասին է։