Ընդդիմադիր պատգամավորներին մանդատից զրկելու հարցը նախորդ շաբաթ կրկին օրակարգային էր: Հայրենի իշխանությունը խորհրդարանական «Հայաստան» խմբակցության պատգամավորների մանդատից զրկելու մտադրության մասին ակնարկեց՝ տեղեկացնելով, թե Ազգային ժողովի խորհուրդը հարցը Սահմանադրական դատարան ուղարկելու համար նիստ կգումարի: Նիստը, սակայն, այդպես էլ տեղի չունեցավ, քանր որ խորհրդարանական ընդդիմադիր երկու խմբակցությունները խորհրդի նիստին չէին մասնակցել, եւ այն տեղի չէր ունեցել: Իշխող «Քաղաքացիական պայմանագիր» խմբակցությունն առ այս պահը չի հստակեցրել՝ հարցն ի վերջո ի՞նչ հանգուցալուծում կստանա: Թեեւ խմբակցության ղեկավար Հայկ Կոնջորյանն օրերս հայտարարել է, թե իշխանությունը մանդատից զրկելու գործընթաց չի սկսի, բայց հաշվի առնելով ՔՊ-ականների՝ հարցը որպես մահակ բանեցնելու «բնավորությունը», չի բացառվում՝ ժամանակներ անց իշխանական պատգամավորներն ընդդիմադիր գործընկերներին «պատժելու» մասին բարձրաձայնեն: Նմանատիպ մի գործընթաց էլ, հիշեցնենք, 2022-ի ամռանն էր մեկնարկել, ինչը նույնպես տրամաբանական ավարտ չունեցավ: Չնայած այդ գործընթացին հաջորդեց այն, որ խորհրդարանական ընդդիմությունը՝ «Հայաստանն» ու «Պատիվ ունեմը», փողոցի պայքարում չհաջողելով, խորհրդարան վերադարձան: Այս մասին «Ազգ»ի հետ զրույցում նաեւ Աժ «Քաղաքացիական պայմանագիր» խմբակցության պատգամավոր Գեւորգ Պապոյանն է ասում՝ նկատելով՝ մանդատազրկության խնդիրը մի կողմից քաղաքական, մյուս կողմից՝ սահամանդրա-իրավական հարցրերի տիրույթում է գտնվում:
«Բայց մինչեւ սահմանադրա-իրավական հարաբերությունները՝ այնտեղ քաղաքական որոշման կարեւոր հատված կա: Օրինակ՝ առաջին անգամ (2022-ի ամռանը մեկնարկած գործընթացը նկատի ունի- Ս.Վ.) մենք ՍԴ չդիմելու որոշում կայացրեցինք, որպեսզի ընդդիմադիր մեր գործընկերներին խորհրդարան գալու ու աշխատելու հնարավորություն տանք: Ըստ էության՝ նրանք այժմ կիսաաշխատանքային ռեժիմում են, ու եթե նկատել եք, ընդդիմությունն այժմ երկու բանով է զբաղված: Առաջինն այն է, որ առավոտյան գալիս, գրանացվում են ու գնում: Դա նրա համար են անում, որ իրենց աշխատավարձից պահումներ չարվեն: Ի դեպ, շատ ուշադիր են աշխատավարձի հանդեպ, ամեն բան անում եմ, որ աշխատավարձից մեկ դրամ անգամ չպակասի: Երկրորդն այն հանգամանքն է, որ մասնակցում են խորհրդարանում տեղի ունեցող քվեարկություններին այն պարզ պատճառով, որ մանդատնից չզրկվեն»,- ներկայացնում է Պապոյանը:
Դիտարկման հետ, թե՝ ստացվում է, որ ընդդիմադիրներին մանդատից զրկելու հարցն իշխանության համար մահա՞կ է, իշխանական պատգամավորը չի համաձայնում՝ բացատրելով, որ եթե ընդդիմության ներկայացուցիչները, ենթադրենք, երկու նստաշրջան աշխատանքի առհասարակ չգային, ապա մանդատազրկությունն անխուսափելի էր լինելու, քանի որ օրվա իշխանությունը պատասխանատու է սեփական քաղաքացու առջեւ, եւ դա անկախ հանգամանքից՝ քաղաքացիների քանի՞ տոկոսն է իշխանությանը, քանի՞սը՝ ընդդիմությանը վստահության քվե տվել:
«Նրանց վատ աշխատանքն է իրենց ու իրենց ընտրողների հարցը, իսկ առհասարակ չաշխատելը մեր բոլորի խնդիրն է: Տեսեք՝ այս ընթացքում մարդկանց սոցիալական վիճակը, գործարար միջավայրը, տնտեսական հարաբերությունները, քաղաքացու կյանքը հեշտացնող մի շարք օրենքներ են բերել Ազգային ժողով, բայց ընդդիմության ներկայացուցիչները «դեմ» կամ «ձեռնպահ» են քվեարկել: Հետեւաբար, այժմ թող մտածեն ու որոշեն՝ իրենց ընտրողներին ինչպես են բացատրելու, թե ինչու են կյանքը բարելավող օրենքիներին դեմ քվեարկել: Առավոտից երեկո խոսում են Ռուսաստանի հետ հարաբերություները բարելավելու մասին, բայց իմ ներկայացրած «Օտարերկրացիների մասին» օրենքում լրացում կատարելու մասին» օրինագծին, որ օտարերկրյա քաղաքացիների՝ Հայաստանում ավելի հեշտ աշխատանքի իրավունք ստանալուն էր վերաբերում, դեմ են քվեարկել: Օրինագծի անվանումը «Օտարերկրացիների մասին» է, բայց պարզ է, չէ՞, որ խոսքը մեծամասամբ ռուսների մասին է: Ես գրեթե վստահ եմ, որ նրանք, օրինագիծը չկարդալու հետեւանքով, հակառուսական գործողություն են իրականացրել»,- ներկայացնում է ՔՊ-ականը:
Մեր մյուս դիտարկմանը՝ այսինքն՝ ընդդիմադիրների հետագա վարքից ու գործունեությունի՞ց է կախված, թե ինչպիսի տրամաբանական ավարտ կունենա մանդատազրկության հարց, Պապոյանը դրական է արձագանքում. «Իհարկե, տրամաբանությունն է այդպես հուշում»:
Ազգային ժողովի «Հայաստան» խմբակցության պատգամավոր Գառնիկ Դանիելյանն «Ազգ»ի հետ զրույցում վստահեցնում է՝ իրենց խմբակցության պատգամավորները բնավ հետաքրքրված չեն իշխանության կողմից նախաձեռնած մանդատազրկության գործընթացով, ավելին՝ այն անլուրջ են որակում՝ չշտապելով պատասխանել, թե այդ մասով ի՞նչ մտահոգություններ ունեն: «Այնպես չէ, որ մանդատից կախված ենք, մենք մեր աշխատանքը լուռ անում ենք: Ես այս ամենը բռնաճնշումների ու հալածանքների տրամաբանության մեջ եմ դիտարկում, որ իշխանությունը 2020-ի դեպքերից հետո գործադրում է ընդդիմադիր քաղաքական գործիչների ու, հատկապես, դաշնակցականների նկատմամբ»,- նշում է Դանիելյանը:
Հարցին՝ իշխանություններն այս քայլով գուցե ցանկանում են լռեցնե՞լ ընդդիմությանը, արձագանքում է՝ ընդդիմադիր գործունեությունը շարունակում են ու շարունեկալու են, եւ նման բռնաճնշումներով իրենց լռեցնել չեն կարող:
«Դուք տեսե՞լ եք, որ մեր ընդդիմադիր գործընկերներից որեւէ մեկը մտածի ինչ-որ չափով թուլացնել ընդդիմադիր գործունեության տեմպը: Վստահաբար չեք տեսել, հետեւաբար այս ամենը մեզ ավելի է ամրապնդում»,- զրույցն ամփոփում է «Հայաստան» խմբակցության պատգամավորը:
Թեմայի վերաբերյալ նաեւ «Պատիվ ունեմ» խմբակցության տեսակետն էինք ցանկանում լսել, բայց խմբակցության պատգամավորները մեծամասամբ հրաժարվեցին տեսակետ հայտնել՝ պատճառաբանելով, թե խնդիրը ՔՊ-ի ու «Հայաստան»-ի դաշտում է: Այլ կերպ ասած՝ մատի ու մատանու արանքը մտնել չցանկացան:
ՍԵՎԱԿ ՎԱՐԴՈՒՄՅԱՆ
