Քաղաքացիական պատերազմի մասին խոսակցություններն այս օրերին առկա են իսրայելական գրեթե բոլոր ԶԼՄ-ներում, իրազեկում է «Իսրայելն այսօր» լրատուն՝ հունվարի 12-ին։ «Սկզբում թվում էր, թե դա պարզապես քաղաքական հռետորաբանություն է, բայց երկյուղ կա, թե այն կարող է իրականություն դառնալ։ Քաղաքացիական պատերազմները խորթ չեն հրեա ժողովրդի համար, գրում է լրատուն, նշում, որ ներքին խռովություններն արդեն մեկ անգամ բաժան-բաժան են արել երկիրը, հանգեցրել կործանման։ Շատերը համոզված էին, որ արդի ժողովրդավարությունն է այն բանալին, որով կարելի էր խուսափել ճակատագրական կրկնությունից՝ Իսրայելի գոյին սպառնացող վտանգներից։ Այժմ առերեւույթ թվում է, թե հենց ժողովրդավարությունն է կործանման խթանողը»։ Ընդդիմադիրները զգուշացնում են, որ վարչապետ Նեթանյահուի օրենսդրական փոփոխություններն են հանրության պառակտման պատճառը։ Իսրայելի նախագահ Հերցոգը հիշեցրել է, որ հրեաներն «ուրիշ երկիր չունեն»։ 3500-ամյա պատմության ընթացքում իսրայելցիները 3 անգամ են ազատ, միացյալ, ինքնիշխան եւ անկախ եղել, ինչպես հիմա են ապրում։
ԱՆԱՀԻՏ ՀՈՎՍԵՓՅԱՆ
Գերմանիա
