ԵՐԿՐՈՐԴ ԱՎԻԱՓՈԽԱԴՐՈՂԸ ԿՍԿՍԻ ԹՌԻՉՔՆԵՐ ԻՐԱԿԱՆԱՑՆԵԼ ԳՅՈՒՄԻԻ ՕԴԱՆԱՎԱԿԱՅԱՆԻՑ

Ա. Մ.

Հայաստանի Հանրապետության կառավարությանն առընթեր քաղաքացիական ավիացիայի գլխավոր վարչության եւ «Տարոն-Ավիա» ավիաընկերության միջեւ ձեռք բերված պայմանավորվածության համաձայնՙ 2017 թվականի ապրիլ ամսվանից Գյումրու «Շիրակ» օդանավակայանում բազավորվելու, կանոնավոր եւ ոչ կանոնավոր թռիչքներ է սկսելու իրականացնել հայկական երկրորդ հավաստագրված ավիափոխադրողըՙ «Տարոն-Ավիա»-ն: Այս մասին տեղեկանում ենք Հայաստանի Հանրապետության կառավարությանն առընթեր քաղաքացիական ավիացիայի գլխավոր վարչությունից: Ըստ վարչության հաղորդագրության, Գյումրու «Շիրակ» օդանավակայանի զարգացման նպատակով, կառավարությունը ձեռնարկել էր մի շարք քայլեր, մասնավորապես, 2014 թվականի դեկտեմբերի 31-ից մեկնող ուղեւորներից ելքի 10000 դրամ տուրքը չի գանձվում, 2017 թ. հունվարի 1-ից Աէրոնավիգացիոն սպասարկման սակագինը նվազեցվել է 50 տոկոսով, իսկ օդերեւութաբանական սպասարկումն իրականացվում է անվճար: «Արմենիա միջազգային օդանավակայաններ» ՓԲԸ-ն էլ 2017 թվականին նախատեսում է իրականացնել շուրջ 3 մլն դոլարի ներդրումՙ «Շիրակ» օդանավակայանի շենքային պայմանների ու ենթակառուցվածքների զարգացման եւ արդիականացման նպատակով: