Հայկական Ազգային ինստիտուտը (ANI) թուրքերեն տարբերակն է բացել իր Հայոց ցեղասպանությունը վավերագրող, արդեն մեծ ժողովրդականություն վայելող կայքի, որը տարեկան ավելի քան չորս միլիոն այցելու է ունենում, հաղորդում է Վաշինգտոնից «Արմինյն Միրոր-Սփեքթեյթր» շաբաթաթերթը: Թուրքերեն տարբերակը հասանելի է «www.turkish.armenian-genocide.org» հասցեում:
Թուրք հաքերների հաճախակի թիրախը դարձած անգլերեն կայքին զուգահեռ նոր թուրքերեն տարբերակը նպատակ ունի ավելի լայն զանգվածներին հասանելի լինել ինչպես Թուրքիայում, այնպես էլ այդ երկրից դուրս: Ներկայացված են, ըստ լրատվության, ինչպես անցյալի, այնպես էլ ներկա ժամանակների որոշումների, վավերագրական փաստաթղթերի թարգմանությունները:
«Թուրքական տարբերակը մեր կայքի հնարավոր դարձավ բազմաթիվ մասնագետների (թարգմանիչներ, խորհրդատուներ եւ նախագծողներ) աջակցության շնորհիվ: Հույս ունենք հետզհետե ավելացնել նյութերի քանակը», նշել է այս առթիվ ՀԱԻ-ի (ANI) տնօրեն Ռուբեն Ադալյանը:
