ՆՁԱԿ-ի գիտատեխնիկական գրադարանը կազմակերպել էր հանդիպում աշխարհագրագետ, քարտեզագիտության եւ մշակույթի պատմության հետազոտող Ռուբեն Գալչյանի հետ «Հայաստանի սահմանների 2600 տարվա պատմությունը. Աշխարհագրական, քարտեզագրական եւ պատմական իրավիճակի փոփոխություններ» խորագրով:
Հանդիպմանը մասնակցել են ՀՀ ՊՆ Վ. Սարգսյանի անվան ռազմական համալսարանի եւ «Հայ Զինվոր» հանդեսի ներկայացուցիչներ, ԵՊԲՀ-ի «Հերացի» ավագ դպրոցի սաներ, մանկավարժներ, ՆՁԱԿ-ի եւ գրադարանի աշխատակիցներ:
Ողջյունի խոսքով հանդես եկավ ՆՁԱԿ-ի Գիտատեխնիկական գրադարանի ղեկավար Լեւոն Ղարիբյանը: Նա կարեւորեց ներկա աշխարհաքաղաքական բարդ իրավիճակում Հայաստանի պատմական սահմանների վերաբերյալ թեմայի արդիականությունը, շնորհակալություն է հայտնել հեղինակավոր քարտեզագետին իր հետ բացառիկ հանդիպումը իրականացնելու, ինչպես նաեւ կարեւոր պատմական ու քարտեզագրական տեղեկություններ պարունակող հեղինակած գրքերի համար:
Ռուբեն Գալչյանը ավելի քան քառասուն տարի զբաղվել է մեր տարածաշրջանի քարտեզներով, խոսեց Հայաստանի սահմանների 2600 տարվա պատմության մասին: Նա ներկայացրեց տարբեր աղբյուրներից ու երկրներից հավաքած բազմաթիվ քարտեզներ ու քարտեզագրական տեղեկություններ: Սրանց թվում են Հայաստանի, Ադրբեջանի, Թուրքիայի միջեւ գոյություն ունեցող պատմական, աշխարհագրական ու մշակութային խնդիրներն ու հակասությունները, որոնք նաեւ բացահայտում են հարեւանների պատմական խեղաթյուրումները:
Քարտեզագետը ներկայացրեց օտարների կազմած կարեւորագույն քարտեզները: ինչպես նաեւ 20-րդ դարի եւ դրանից հետո կազմված Հայաստանի անկախ հանրապետությունների սահմանները ցուցադրող քարտեզներ եւ խոսեց Հայաստանի սահմանների պարբերաբար փոփոխությունների ու դրանց հիմնական պատճառների մասին:
Մասնակիցները ծանոթացան Գիտատեխնիկական գրադարանի մասնա-գիտական տեղեկատվական պաշարների թեմատիկ ցուցահանդեսին:
Անշուշտ մասնագետի կողմից կատարվել է լավ աշխատանք:Այն ցանկալի կլինի ներկայացնել պատկան մարմիններին հետագայում լավագույն արդյունքների հասնելու համար:
ՍՏԵՓԱՆ ՊԱՊԻԿՅԱՆ
Ռուսաստանի բնագիտության ակադեմիայի պրոֆեսոր
