Հունիսի 10-ին Հայաստան են այցելելու ԵԱՀԿ Մինսկի խմբի համանախագահները: Նրանք մեկնելու են Արցախ, հետո նաեւ Բաքու: Ըստ ՌԴ արտգործնախարարության մամուլի խոսնակ Մարիա Զախարովայի ` համանախագահներն ուզում են ԼՂ հարցի շուրջ հստակեցնել իրավիճակը: Թե ինչ հստակեցումների մասին է խոսքը` Զախարովան չի մանրամասնել, իսկ Հայաստանի փոխարտգործնախարար Շավարշ Քոչարյանն այդ այցից մեկ ակնկալիք ունի`ադրբեջանական կրակոցների դադարեցում սահմաններում:
Հետաքրքրական է, որ համանախագահների այցն այս անգամ զուգահեռվում է տարածաշրջանային սուր իրավիճակների հետ` Քաթարի շուրջ զարգացումները եւ նախորդ օրը Իրանում տեղի ունեցած ահաբեկչությունները: Արդյոք համանախագահների այցը կապ ունի՞ տարածաշրջանային անվտանգության այս հանգրվանի հետ, թե հերթական, շարքային այց է, եւ ի՞նչ էր ակնարկում Մարիա Զախարովան` հստակեցում ասելով, շուտով պարզ կլինի: Սակայն մեր պաշտպանական ուժերի գերուշադրությունն այս օրերին մեր սահմաններում ավելորդ չէ:
