Ադրբեջանը հայտարարում է, որ մինչեւ 2025-ը մտադիր է վերակառուցել եւ ավարտին հասցնել դեպի Ստեփանակերտ գնացող գազամուղը: Այս մասին տեղեկացնում են ադրբեջանական լրատվամիջոցները՝ հղում անելով «Ազերգազ» գործակալությանը:
«Ազերգազ»-ի տնօրեն Թեյմուր Ջաֆարովն օրերս հայտարարել է, որ մտադիր են ադրբեջանական գազը հասցնել ու վերականգնել Լեռնային Ղարաբաղի ամբողջ տարածքում:
Թե ինչ հեռահար նպատակ է հետապնդում ադրբեջանցիների այս հայտարարությունը, դժվար չէ գուշակել: Պաշտոնական Բաքուն, որ մտադիր է թե՛ Շուշին, թե՛ Ակնան, գազաֆիկացնել, մտածում է նաեւ Ստեփանակերտին գազ մատակարարելու մասին: Իր վերահսկողության տակ անցած Շուշի, օրինակ, գազ կարող է հասցնել Ստեփանակերտի տարածքով միայն, հետեւաբար առաջիկայում նաեւ Արցախի մայրաքաղաքը կարող է օգտվել «Ազերգազի» մատուցած ծառայություններից: Բայց միայն Բաքվի ցանկությունը բավարար չէ, քանի որ այս պահին հայկական երկրորդ հանրապետությունը գազ ստանում է Հայաստանից: Իսկ Հայաստանին, գիտենք, գազ Ռուսաստսնն է մատակարարում: Հետեւաբար Ադրբեջանի ախորժակը, կապված Արցախին գազ մատակարարելու հետ, ուղղակիորեն պաշտոնական Մոսկվայի հետ է կապված:
«Ազգ»ի հետ զրույցում մի քանի տնտեսագետներ վստահեցրեցին, որ հարցը առեւտրային կամ շուկայական հարաբերություններում դիտարկել չի կարելի, քանի որ ռուսական «Գազպրոմի» համար փոքրիկ Արցախը, շուկայական հարաբերությունների տեսանկյունից, իրականում էական դեր չի խաղում: Սա քաղաքական հարց է, թե Ռուսաստանը կհանդուժի՞ արդյոք, որ իր խաղաղապահ զորքերի կողմից վերահսկվող տարածքին Բաքուն գազ մատակարարի:
Հայաստանից դեպի Արցախ գնացող գազամուղի որոշ հատվածներ Ադրբեջանի վերահսկողության տակ գտնվող տարածքներով են անցնում: Այս տարի մի քանի անգամ ենք ականատես եղել՝ ինչպես են ադրբեջանցիները պայթեցրել կամ փակել գազախողովակներն ու Արցախն ընդհուպ մեկ ամիս առանց կապույտ վառելիքի է մնացել: Իհարկե, պարզ է, որ սցենարն ամեն պահի կարող է կրկնվել, հետեւաբար կարեւոր է, որ այս հարցում թե՛ Արցախի, թե՛ Հայաստանի իշխանություններն ու թե՛ ռուս խաղաղապահ զորքերի հրամանատարությունը ճիշտ ու հաշվենկատ որոշումներ կարողնան ընդունել:
ՍԵՎԱԿ ՎԱՐԴՈՒՄՅԱՆ
