«Ռուսաստանի մեր գործընկերները հայտարարել են, որ իրենց կարծիքով՝ ճիշտ մոտեցումը կլինի այն, որ Լեռնային Ղարաբաղի կարգավիճակի հարցը հետաձգվի անորոշ ժամանակով, և սա հիմնավորվում է նրանով, որ այս պահին օբյեկտիվորեն չկա հնարավորություն գտնել մի կարգավիճակ, որը փոխընդունելի կլինի: Այսինքն՝ իմաստն այն է, որ կարգավիճակի հարցը հետաձգվի»,- նոյեմբերի 2-ին, ԱԺ-ում 2023 թվականի բյուջեի քննարկման ժամանակ ասաց վարչապետ Նիկոլ Փաշինյանը։
Նա նշել է, որ այս դիրքորոշումը լիովին համապատասխանում է ՀՀ կառավարության մոտեցմանը։
«Եռակողմ բանակցությունների ընթացքում, ինչպես խոստացել էի, մենք առաջարկել ենք, որ Սոչիի եռակողմ հայտարարության ժամանակ հղում կատարվի ռուսական առաջարկներին, բայց ռուսաստանցի մեր գործընկերների հորդորով փորձել ենք ավելի ճկուն լինել իրավիճակը փակուղային չդարձնելու համար»,- ասաց նա
Նիկոլ Փաշինյանը, նոյեմբերի 9-ի հայտարարությանը հղում կատարելով, ասաց, որ Լեռնային Ղարաբաղում խաղաղապահների ներկայության ժամկետը երկարաձգվում է ինքնաբերաբար, այսինքն՝ այն կարող է չերկարացվել այն դեպքում, երբ կողմերից որևէ մեկը առաջարկ ներկայացնի ժամկետը լրանալուց վեց ամիս առաջ:
«Ես համաձան եմ, որ ԼՂ-ում կամ ԼՂ հայության իրավունքների և անվտանգության երաշխավորման կարևորագույն գործոնը խաղաղապահների ներկայությունն է այնտեղ, քանի դեռ չեն ստեղծվել անվտանգության ապահովման հուսալի մեխանիզմներ և երաշխիքներ: Մեր քաղաքականությունը Սոչիից առաջ և Սոչիից հետո նույնիսկ նվազագույն փոփոխություն չի կրել, քանի որ մեր քաղաքականությունը եղել է դա, և շատ ուրախ եմ արձանագրել, որ Սոչիում վերահաստատվեցին Պրահայում ձեռք բերված պայմանավորվածությունները, և մենք շարունակելու ենք մեր ակտիվ գործունեությունը խաղաղության օրակարգի իրագործման շուրջ»,- ասաց Փաշինյանը:
