Իսրայելի վարչապետ Յաիր Լափիդը դատապարտել է պաշտոնական Կանբերրայի քայլը, իսկ արտգործնախարարությունը պարզաբանման համար հրավիրում է Ավստրալիայի դեսպանին։
Հոկտեմբերի 18-ին այս լուրը տարածած «Իսրայելն այսօր» գերմանալեզու լրատվականը իրազեկում է, որ երեքշաբթի Լեյբորիստների կուսակցության ղեկավարած Ավստրալիայի կառավարությունը պաշտոնապես չեղյալ է հայտարարել Արեւմտյան Երուսաղեմը՝ որպես Իսրայելի մայրաքաղաք ճանաչելու որոշումը, հաստատելով նաեւ նախօրեին ավստրալական «Գարդիանի» հաղորդածը, թե պաշտոնական Կանբերրան Լիբերալ կուսակցության նախկին վարչապետ Սքոթ Մորիսոնի որդեգրած դիրքորոշումը վերանայում է։
Ավստրալիայի կառավարությունը միակամ է այն հարցում, որ Երուսաղեմի կարգավիճակը պիտի որոշվի պաղեստինցիների հետ խաղաղ բանակցությունների ժամանակ, որի հանգուցալուծումը կլինի «երկու պետություն ճանաչելը»։ «Մենք չենք սատարի այս դիտանկյունը խաթարող որեւէ որոշման», ասել է Ավստրալիայի արտգործնախարար Փեննի Ուոնգը (Penny Wong) երեքշաբթի «Ասոշիեթիդ պրեսս» գործակալությանը։ Ավստրալիայի վարչապետ Էնթոնի Էլբանիզը (Anthony Albanese) , ինչպես նաեւ արտգործնախարար Ուոնգը 2022-ի մայիսին են իշխանության եկել։
Ինչպես հաղորդել է ավստրալական «Գարդիանը», Ավստրալիայի արտաքին գործերի եւ առեւտրի նախարարությունների կայքէջերից երկուշաբթի օրը ջնջվել է հետեւյալ տեքստը. «2018-ի դեկտեմբերին Ավստրալիան, հետեւելով երկարամյա քաղաքական գծին, ճանաչում է Արեւմտյան Երուսաղեմը՝ որպես Իսրայելի մայրաքաղաք, ուր Կնեսսետի նստավայրն է եւ Իսրայելի կառավարության տարբեր հաստատություններ»։
Իսրայելի վարչապետ Լափիդի պատասխանը հետեւյալն է եղել. «Երուսաղեմը Իսրայելի հավերժական, չտրոհվող մայրաքաղաքն է, եւ որեւէ բան չի փոխվելու այդ առնչությամբ»։
ԱՆԱՀԻՏ ՀՈՎՍԵՓՅԱՆ
Գերմանիա
