Մ. Նահանգների Կոնգրեսի վերին պալատի առաջիկա նոյեմբերին կայանալիք մասնակի ընտրություններում թուրք հայտնի սրտաբան Մեհմետ Էոզի թեկնածու առաջադրման դեմ ամերիկահայ համայնքն այս օրերին բուռն արշավ է ձեռնարկել: Նախորդ շաբաթ օրը Կալիֆորնիայի Օրենջ շրջանում տեղի ունեցած հավաքին, որտեղ թուրք բժշկի կողմնակիցների նվիրահավաքն էր տեղի ունենում նրա առաջադրման նպատակով, մեծախումբ հայեր բողոքի ակցիաներ են կազմակերպել «Ցեղասպանությունն ուրացողները ողջունելի չեն Կալիֆորնիայում» ու նման լոզունգներով եւ ԱՄՆ-ի ու Հայաստանի դրոշներով:
Հայերի գլխավոր առարկությունն այն է, որ Մեհմետ Էոզը ամերիկյանի կողքին պահպանել է Թուրքիայի քաղաքացիությունը: «Վաշինգտոն փոստ» թերթը, մյուս կողմից, թուրք բժշկի մասին հոդված է տպագրել, որտեղ նշում է, որ նա սերտ հարաբերություններ ունի Էրդողանի եւ Թուրքիայի պետական բարձր խավի այլ ներկայացուցիչների հետ, տեղեկացնում է «Պայքար» շաբաթաթերթն իր հոկտ. 16-ի համարում:
