Օսկարակիր Սյուզան Սարանդոնի եւ հայազգի Տիգրան Ձիթողցյանի մասնակցությամբ «Ամերիկյան հայելի: Անմահության ազդարարում» («American Mirror-Intimations of Immortality») ֆիլմը վերջերս Լոս Անջելեսում կայացած վավերագրական ֆիլմերի փառատոնում արժանացել է գլխավոր մրցանակիՙ տրամադրված «Փարաջանով-Վարդանով ֆիլմ ինստիտուտի» կողմից: Ռեժիսոր Արթուր Բոլդերի ֆիլմին ընդհանուր առմամբ չորս մրցանակ է շնորհվելՙ լավագույն նորարարական ֆիլմ, լավագույն կինեմատոգրաֆիա, լավագույն կոմպոզիտոր եւ գլխավոր մրցանակ անվանակարգերում: Գլխավոր մրցանակը շնորհվել է Սյուզան Սարանդոնին: Դրա նախկին մրցանակակիրները եղել են Էմմա Թոմպսոնը, Մարտին Սկորսեզեն եւ Ժան Վիգոն: Պրոդյուսեր Դեյվիդ Շարայի ֆիլմում նկարահանվել են նաեւ Ֆլորենս Ֆեվրը, Աշլի Հինշոուն եւ Հիլարի Ռոդան:
Ֆիլմը վավերագրականի եւ գեղարվեստականի յուրօրինակ միաձուլում է, որտեղ նվիրյալ նկարիչ Տիգրանը փորձում է անցյալի վարպետների ոգին վերակենդանացնել նյույորքյան սոցիալ-մշակութային ռեալիզմի նորագույն տիրույթում: Երեք տարվա ընթացքում նկարահանված ֆիլմը հազվագյուտ էքսկուրս է, թե ինչպես արվեստագետը կարող է հասնել հաջողությունների եւ ճանաչման: Ֆիլմի վերնագիրը առնչություն ունի անգլիացի բանաստեղծ, լեյկիստներիՙ «լճային դպրոցի» հիմնադիր-գաղափարախոսներից Ուիլյամ Ուորդսուորդի (1770-1850) գրած վաղ մանկական հիշողություններին նվիրված ներբող-պոեմի հետ: Ֆիլմի երաժշտությունը գրել է Մարկ Պետրին :
Նկար 1. Սարանդոնըՙ Բոլդերի հետ
