Այս տարի Հայոց ցեղասպանության 104-րդ հիշատակությունը նյույորքյան Թայմս Սքուերում նշանավորվելու է մշակութային յուրահատուկ միջոցառումով, որը տեղի է ունենալու ապրիլի 28-ին, ժամը 14:00-ից16:00: Ըստ «Արմինյն Միրոր-Սփեքթեյթր» շաբաթաթերթի, ճանաչված երգիչ Էլի Բերբերյանը այդ միջոցառման ընթացքում հնչեցնելու է մեծն Շառլ Ազնավուրի «Նրանք ընկան» (Ils Sont Tombe՛s) երգը, հարգանքի տուրք մատուցելով ինչպես արդեն սրբերի շարքին դասված մեր անմեղ զոհերի, այնպես էլ անցյալ տարվա վերջերին վախճանված շանսոնյեի հիշատակին:
«Ազնավուրը հայ արվեստագետների պատմության մեջ ամենամեծ լեգենդն է, եւ ես ցանկանում եմ իր բառերը բարձրաձայնել աշխարհի կենտրոնից», նշել է այդ առթիվ Բերբերյանը, որ նաեւ ծրագրել է երգել Մաժակ Թոշիկյանի երաժշտությամբ Հովհաննես Շիրազի «Ինձ կմոռանամ» (Հայոց Դանթեական) համազգային հնչեղության պոեմը եւ գուսան Հայկազունի «Հայեր միացեքը»ՙ որպես միասնականության ուղերձ:
Միջոցառումը վարելու են Արմեն ՄկՕմբերը եւ Նվայր Բեյլերյանը : Ներկա են լինելու հայ եւ օտար քաղաքագետներ, դիվանագետներ, մարդու իրավունքների պաշտպաններ, արվեստագետներ, հոգեւորականներ եւ հասարակության ներկայացուցիչներ:
Թայմս Սքուերի ավանդական ոգեկոչման արարողության հիմնադիրն է Սեմ Ազատյանը , որ Հայոց ցեղասպանության ժամանակ կորցրել է չորս հարազատների եւ 1985-ին մտահղացել է Նյու Յորքից աշխարհին տեղյակ պահելու պատմության առաջին խոշոր ոճրագործության մասին:
