Հրազդանի հիդրոէլեկտրակայանը Սեւան-Հրազդան կասկադի երկրորդ հիդրոէլեկտրակայանն է: Շահագործման է հանձնվել է 1959 թվականին: Օգտագործում է Սեւանի ՀԷԿ-ի հեռացնող թունելի ելքի եւ Հրազդանի ջրամբարի միջեւ ընկած հատվածի 149 մետր անկումը: Դերիվացիան կազմում է 15,1 կիլոմետր: Այն Սեւանի ՀԷԿ-ի հեռացնող թունելի շարունակությունն է:
Կազմված է 7785 մ ընդհանուր երկարության երեք բաց ջրանցքներից եւ 6370 մ ընդհանուր երկարության երկու թունելից: Երրորդ ջրանցքի վերջում տեղավորված է ճնշման ավազանը, որից ջուրը երկու առանձին պողպատե խողովակաշարերով հոսում է դեպի տուրբինները: Հրազդանի հիդրոէլեկտրակայանում տեղադրված են 81,6 ՄՎտ ընդհանուր հզորությամբ 2 հիդրոագրեգատ, յուրաքանչյուրը 40.8 ՄՎտ հզորությամբ: Շառավղաառանցքային տուրբինները Ֆոյթ ընկերության արտադրության են, գեներատորներըՙ Սիմենս ընկերության:
Կարծում եմ ճիշտ կլիներ, եթե Հրազդանի ՀԷԿ-ն աշխատի հիդրոակումլյացիոն ռեժիմով: Այսինքն գիշերային ժամերին պոմպերի օգնությամբ ջուրը ստորին ավազանից մղվում է վերին ավազան: Առավոտյան եւ երեկոյան պիկային ժամերին այն օգտագործվում է լրացուցիչ պիկային էլեկտրական էներգիա ստանալու համար: Այս դեպքում բավականին կբարձրանա էներգահամակարգի աշխատանքի հուսալիությունը եւ կտնտեսվեն վառելիքաէներգետիկ ռեսուրսներ:
Նկար 1. Հրազդանի ՀԷԿ-ի արտաքին տեսքը
