ԳՈՀԱՐ ԲՈՏՈՅԱՆ, ՌԴ-ում «Ազգի» հատուկ թղթակից
Ապրիլի 21-ին ՌԴ նախագահ Վլադիմիր Պուտինը Մոսկվայի «Մանեժի» կենտրոնական ցուցասրահում հրապարակել է Դաշնային ժողովին ուղղված իր ամենամյա ուղերձը:
Ռուսաստանի նախագահը սկսեց առողջապահությունիցՙ նշելով, որ միլիոնավոր ռուսաստանցիներ, որոնք պայքարում էին կորոնավիրուսի տարածման դեմ, աշխատում էին արագ, որակով եւ խղճով: Նախագահի կարծիքովՙ կորոնավիրուսը վերջնականապես չի հաղթահարվել եւ մնում է ուղղակի սպառնալիք, բոլոր սահմաններն անհրաժեշտ է պահել վերահսկողության ներքո: Ընտանիքը, բարեկամությունը, փոխօգնությունն ու համախմբվածությունը Ռուսաստանում առաջին պլանում են, երկիրը միշտ կպաշտպանի այդ արժեքները: Պուտինը ռուսաստանցիներին կոչ արեց առավելագույնս պատասխանատվությամբ կատարելու բժիշկների հանձնարարականները համավարակի դեմ պայքարի համար:
ՌԴ նախագահը առողջապահական հարցերից հետո անցավ կրթությանը, ասաց, որ պետք է որոշ շտկումներ անել պատմության դասագրքերում, խոսեց տնտեսությունից: Նշեց, որ պետք է օգնել այն շրջաններին, որոնք այսօր պարտքեր ունեն, ներկայացրեց նոր վարկային ծրագրեր:
Վլադիմիր Պուտինն իր ուղերձում նոր վճարումներ խոստացավ, օրինակՙ հղի կանանցՙ ամսական 6000 ռուբլու չափով, դպրոցահասակ երեխաների ծնողներինՙ 10 հազար ռուբլու չափով:
Ուղերձի մեծ մասըՙ մեկ ժամից ավելին, նվիրված էր ներքին, մեծամասամբ սոցիալական հարցերին, իսկ վերջին 20 րոպենՙ արտաքին քաղաքականությանն ու անվտանգությանը:
Ուղերձում Պուտինը հերթական անգամ անդրադարձավ Արեւմուտքին, ասելովՙ եթե որեւէ մեկը փորձի Ռուսաստանի հանդեպ անցնել «կարմիր գիծը, ապա նրանք այնպես կզղջան, ինչպես երբեք չեն զղջացել ոչ մի բանի համար»: Պուտինը նշեց, թե կարմիր գիծը Ռուսաստանն է գծելու ամեն կոնկրետ դեպքի համար:
Պուտինի խոսքերովՙ Ռուսաստանը չի ցանկանում այրել կամուրջները, բայց եթե որեւէ մեկը բարի մտադրությունը որպես թուլություն ընկալի եւ մտադրվի վերջնականապես այրել, կամ նույնիսկ պայթեցնել կամուրջները, ապա պետք է իմանա, որ պատասխանը կլինի «արագ եւ խիստ»:
Վլադիմիր Պուտինը ապրիլի 21-ին Դաշնային ժողովին ուղղված ուղերձում խոսեց նաեւ ղարաբաղյան հակամարտության մասինՙ նշելով, որ ՌԴ-ն եղել է Ղարաբաղում անցյալ տարվա աշնանը սանձազերծված պատերազմը դադարեցնելու հարցում գլխավոր դերակատարը:
Պուտինի խոսքովՙ Ռուսաստանը ձգտում է աջակցել տարածաշրջանային հակամարտությունների կարգավորմանը եւ արդեն շատ բան է արել Սիրիայում իրավիճակի կայունացման, Լիբիայում քաղաքական երկխոսություն հաստատելու համար: «Ռուսաստանը գլխավոր դեր է խաղացել այն հարցում, որ հաջողվել է դադարեցնել զինված հակամարտությունը Լեռնային Ղարաբաղի շրջանում»,- ընդգծեց Պուտինը:
Պուտինի ուղերձը նախատեսածից երկար տեւեցՙ 1 ժամ 20 րոպե: Դահլիճում նստած պատգամավորները, պաշտոնյաները, հասարակական եւ մշակութային գործիչները ակտիվ ծափահարում էին, ոմանքՙ գրառումներ անում:
Միջոցառման ավարտին ԶԼՄ ներկայացուցիչներիս հնարավորություն ընձեռնվեց հանդիպելու եւ հարցեր ուղղելու ՌԴ Պետդումայի պատգամավորներին, որոնք կարեւորեցին երկրի նախագահի ուղերձում նշված մեծածավալ փոփոխությունների անհրաժեշտությունն ու հրատապությունը: Ռուս մի քանի պատգամավորներ էլ ինձ հավաստիացրին, որ Ռուսաստանն ամեն ինչ անում է 2020 թ. նոյեմբերի 9-ի եռակողմ հայտարարության դրույթները խստորեն պահպանելու եւ կյանքի կոչելու ուղղությամբ:
Հիշեցնենք, որ Եռակողմ հայտարարության համաձայն` Լեռնային Ղարաբաղի շփման գծի եւ Լաչինի միջանցքի երկայնքով տեղակայվել է Ռուսաստանի Դաշնության խաղաղապահ զորակազմըՙ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային եւ հատուկ տեխնիկայով:
Ռուսաստանի Դաշնության խաղաղապահ զորակազմը տեղակայվել է 5 տարի ժամկետով, որից հետո այդ ժամանակահատվածը մեխանիկորեն կերկարաձգվի եւս 5 տարով, եթե կողմերից որեւէ մեկը ժամկետի ավարտից 6 ամիս առաջ չհայտարարի տվյալ դրույթի կիրառումը դադարեցնելու մտադրության մասին:
