Ֆրանսահայ Դընի Դոնիկյանի գրական հունձքը
Մոտ 50 երկար տարիներ Դընի Դոնիկյանը (Denis Donikian) ձայնազուրկների մունետիկն է եղել, անզիջող քննադատը կաշառակերների ու բռնապետերի: Ծնվել է Վիենում (Ֆրանսիա) Ցեղասպանությունից փրկված ծնողների ընտանիքում: Հեղինակ է, ըստ «Միրոր Սփեքթեյթր» շաբաթաթերթի, ավելի քան 40 արձակ եւ չափածո հատորների: Գրում է հիմնականում ֆրանսերեն լեզվով, երբեմն նաեւ հայերեն: Ավարտել է Սեւրի քոլեջը եւ Երեւանի պետական համալսարանը: Շատ է ճանապարհորդել: Եղել է Ուկրաինայում եւ Վրաստանում, որտեղ առիթ է ունեցել ծանոթանալու Սերգեյ Փարաջանովի հետ: Բեղմնավոր գրող է: Նախասիրած թեմաներն են կանայք, աֆորիզմները, Փարաջանովը: Այդ թեմաներին էլ նվիրել է իր եռերգությունը: Բայց դրանցից առաջ նա հրատարակել է «Հայոց ցեղասպանության (400 էջանոց) համառոտ հանրագիտարանը» (La Petite Encyclopedie du Genocide Armenien) որոշակի թեմաներ պարունակող գլուխներով:
Գալով եռերգությանը, առաջինը գեղեցիկ սեռին է նվիրված: Դոնիկյանը պարզապես սիրում է նրանց հմայքը, հրապուրելու շնորհքը, հնարամտությունն ու պճնագեղությունը: Բանաստեղծությունների երկլեզու հատորի վերնագիրն է «Իգական մարմնի էությունը» («L՛Esprit du Corps Feminin), բավականին էրոտիկ բովանդակությամբ: Հաջորդը աֆորիզմներիՙ «Ապուշների եւ ապուշության մասին» գիրքն է (Idiots and Idiocy), որտեղ ամփոփված են 201 խիստ ուշագրավ, երբեմն զավեշտական եւ երբեմն էլ քննադատական աֆորիզմներ, հայոց պատմության, մշակույթի, հեռատեսության պակասի եւ կառավարական հիմնարկների անազնիվ ղեկավարների վերաբերյալ: Դոնիկյանն ու կանադահայ Արա Պալիոզեանը սփյուռքահայ երկու գրողներն են, որոնք ամբողջական հատոր են նվիրել աֆորիզմներին: Երրորդ գիրքը հայերենից անգլերենի է թարգմանել Լիլիթ Մնացականյանը: Վերնագրված է «Փարաջանովի ձիերը» (Paradjanov՛s Horses): Դոնիկյանը բանաստեղծությունների այդ հատորը գրել է ավելի քան 40 տարի առաջՙ 1979-ին, Թբիլիսիում հանճարեղ ռեժիսորի հետ հանդիպումից հետո:
Գրքերի հրատարակման առթիվ Դոնիկյանը խոստովանել է, որ իր վրա մեծ ազդեցություն են թողել եւ ներշնչանքի աղբյուր ծառայել Սեն-Ժոն Պերսն ու Սոլժենիցինը:
Գրողի վերաբերյալ հավելյալ տեղեկություններ ստանալու համար այցելել www.denisdonikian.com կայքը:
