azg.am
Լարված ու գերլարված այս օրերին, ռազմական ու քաղաքական նորանոր զարգացումների թափի տակ, որեւէ լրատվամիջոցի արձակուրդում գտնվելը, խոստովանենք, անհեթեթ է։ «ԱԶԳ» շաբաթաթերթը հայտարարել էր իր երկշաբաթյա արձակուրդ գնալու մասին` ընթերցողներին խոստանալով կրկին հանդիպել օգոստոսի 13-ին։ Սակայն միմյանց հրմշտկող իրադարձությունները ստիպում են խմբագրությանը մասնակիորեն ընդհատել արձակուրդը եւ օգտագործելով azg.am-ի հարթակը` ամենօրյա վերլուծություններով եւ մեկնաբանությամբ ընթերցողներին բացատրել իրադարձությունների խորքային պատճառները ու փորձել կռահել դրանց հետեւանքները։
Սկսում ենք տաղանդավոր հեռուստալրագրող եւ զրուցավար Դավիթ Սարգսյանի` «ԱԶԳ»ի համար գրված այս վերլուծականով, որը անմիջական անդրադարձն է երկու օր առաջ Ալեն Սիմոնյանի,- ամենայն հավանականությամբ Ազգային ժողովի ապագա նախագահ,- այն հայտարարությանը, թե առաջիկայում կազմվելու է խորհրդարանական հատուկ հանձնաժողով` 44-օրյա պատերազմի հանգամանքները քննող։ Դ. Սարգսյանը հատկապես ուշադրության առարկա է դարձնում Շուշիի անկման պատմությունը։
Հետեւեք մեր ամենօրյա հրապարակումներին. դրանք կօգնեն ավելի լավ ըմբռնել իրադարձությունները։
