ՆԱՄԱԿՙ ԽՄԲԱԳՐՈՒԹԵԱՆ

Տոքթ. ՆՈՐԱՅՐ ՄԱՆՃԵԱՆ, Երեւան, 14.8.2021

Պատուարժան խմբագրութիւն,

Մեծ ուրախութեամբ կարդացի յարգարժան պրն. Յակոբ Միքայելեանի հարցազրոյցը դոկտ. Յակոբ Չոլաքեանի հետ, որ լոյս տեսած էր «ԱԶԳ»ի 12.8.2021 թիւին մէջ:

Յ. Չոլաքեանի տարեկիցն եմ, մօտէն ծանօթ եմ իր գրական վաստակին ու միշտ բարձր գնահատած եմ իր գործերը:

Կ՛ուզեմ այս առիթով կիսել երկու Յակոբներուն մտահոգութիւնները, որոնք նաեւ իմն են:

Այո, բժիշկը, երկրաչափը, կղերականը, դերասանը, երգիչը, գրողը, գիտնականը, արուեստագէտը, դաստիարակը, դիւանագէտը, քաղաքական գործիչը, լրագրողը, նկարիչը, ուսեալ հողագործն ու բանուորը, բոլորը մտաւորականներ են, այնքան ժամանակ, որ կը մտածեն, կը ստեղծեն:

Այո, ձեզի հետ միասին, ըսած եմ ու կ՛ըսեմՙ բոլորը պէտք է ՀԱՄԵՐԱՇԽՈՒԹԵԱՆ ՈՒ ԵՂԲԱՅՐՈՒԹԵԱՆ ձգտին:

Այո, հայոց լեզուն մէկ է, ժամանակի ընթացքին, գրաբարէն սկսեալ մինչեւ այսօր հայոց լեզուն կը մնայ մէկՙ իր զոյգ ճիւղերով, իր բարբառներով:

Հայաստանը լինելու է «Ի սկզբանէ էր Բանն, եւ Բանն էր առ Աստուած»: Հայաստանը Աստուծոյ հրաշքներէն մէկն է: