«Հաշվի առնելով, որ Ավետիք Չալաբյանը 3 ամիս 13 օր փաստացի անազատության մեջ է եղել, փաստացի անազատության մեջ գտնվելու մեկօրյա ժամկետը հաշվելով ազատության սահմանափակման ձևով նշանակված պատժի 2 օրվա դիմաց, ընդհանուր 6 ամիս 26 օր, Ավետիք Չալաբայանի նկատմամբ վերջանական պատիժ նշանակել ազատության սահմանափակում 1 տարի 11 ամիս 4 օր ժամկետով»,- Երևանի ընդհանուր իրավասության դատարանում, դատավոր Մնացական Մարտիրոսյանի գլխավորությամբ ընթացող Ավետիք Չալաբյանի գործով դատական նիստին հայտարարեց դատախազը։
Մինչ այդ նա պահանջել էր Ավետիք Չալաբյանին ազատազրկել 2,5 տարով։
Դատավորը հայտարարեց, որ լրացուցիչ լսումները ավարտված են և գնում են առանձին սենյակ՝ վճիռ կայացնելու։
«Դատավճռի եզրափակիչ մասը կհրապարակվի դեկտեմբերի 21-ին, 17։30-ին», – հայտարարեց դատավորը։
«Հայաքվե» նախաձեռնության համակարգող Ավետիք Չալաբյանի դատավարության ու ազատազրկման մասին «Հայաքվեի» ներկայացուցիչ, միջազգայնագետ Արմեն Մանվելյանն ասել է. «Դատախազը Չալաբյանի համար պահանջեց մեկ տարի 10 ամիս ազատության սահմանափակում՝ միաժամանակ արգելելով հասարակական գործունեությամբ զբաղվել, մասնակցել ցույցերին և կազմակերպել ցույցեր, փաստացի ավելի քաղաքական դատապատիժ հնարավոր չէր ակնկալել, այսինքն` ռեժիմը փորձում էր կեղծված դատավճիռներով արգելել Ավետիք Չալաբյանին քաղաքականությամբ զբաղվել»։
Հիշեցնենք, որ մեղադրական եզրակացության համաձայն՝ Ավետիք Չալաբյանին մեղադրանք է առաջադրվել, որովհետև նա 2022 թվականի մայիսի 4-ին Երևանի Աբովյան 12 հասցեում գտնվող՝ «Դալան» ռեստորանում, այնուհետև մայիսի 08-ին՝ Հայաստանի ազգային ագրարային համալսարանի ուսանողական խորհրդի սենյակում նշված համալսարանի ուսանողական խորհրդի նախագահ Թոռնիկ Ալիյանին և նրա միջոցով Հայաստանի ազգային ագրարային համալսարանի ուսանողական խորհրդի անդամներին ու համալսարանի ուսանողներին ՀՀ-ում «Դիմադրություն» և «Համախմբում» շարժումների հավաքներին՝ անհնազանդություններ, բողոքի ակցիաներին, ցույցերին, փողոցներ փակելու գործողություններին մասնակցելու նպատակով դիտավորությամբ նյութապես շահագրգռել է՝ առաջարկելով 2.000.000 ՀՀ դրամ գումար:
