Արդյոք այն շենքը, որտեղ գտնվել են այս գիշեր մահացած 15 զինվորները, բավարարել է զորանոցային շենքի պայմաններին։ Դատելով համացանցում տարածված լուսանկարներից՝ դա զորանոց չի եղել, այլ լքված սեփական տուն։ Զորանոցը պետք է ուեննա հատուկ պայմաններ, որտեղ անձնակազմի արագ կողնորոշման և տարածքն արագ լքելու միայն մեկ մուտք չպետք է լինի, պետք է նաև հետնամուտք և անհրաժեշտ հակահրդեհային պաշտպանության միջոցներ լինեն, Azg.am-ի թղթակցի հետ զրույցում ասաց ռազմական փորձագետ Հայկ Նահապետյանը։
«Այստեղ հարց է ծագում՝ ի՞նչ գործ ունի զինվորական անձնակազմը ոչ զորանոցային պայմաններում։ Այս հարցի պատասխանը թող Պաշտպանության նախարարն ու ԳՇ պետը տան։ Երկրորդ, քննությունը ցույց կտա՝ գիշերվա ընթացքում հրդեհ, թե դիվերսիոն գործողություն է եղել։ Ո՞վ է ասում, որ 15 զինվոր հրդեհի հետևանքով է մահացել։ Երրորդ, եթե տեսակնորեն հրդեհ է եղել, ես չեմ բացառում, որ զինվորները ծխահարվել են, որովհետև հնարավոր չէ, որ միանգամից բոլոր մահճակալների մոտ կրակ բռնկվի, և բոլորը միանգամից այրվեն։
Չեմ բացառում, որ ծխահարված լինեն, հետո հրդեհ բռնկվի, և հետո անձնակազմից մեկ-երկու հոգի ուշքի եկած լինեն։ Սա նշանակում է, որ վառարանը, ամենայն հավանականությամբ, փայտի չի եղել, բռնկումը շատ արագ է եղել։
Չորրորդ, եթե անգամ տեսականորեն խուճապը մեծ է եղել, հնարավոր չէր, որ 15 զինվոր այրվեր։ Հրդեհն ինքը գործընթաց է»,- ասաց Հայկ Նահապետյանը։
Մեր զրուցակցի կարծիքով՝ տեղի ունեցածը կամ ահաբեկչական գործողություն է՝ ադրբեջանական հատուկ ծառայությունների ներթափանցմամբ, կամ ծխահարություն։
«Հակառակ դեպքում, զինվորները կարող էին պատուհաններից դուրս գալ։ Այնուհետև, լուսանկարներում երևում է, որ պատ է փլուզված, մինչդեռ գյուղերում՝ այն էլ նման ցրտաշունչ ձմեռներ ունեցող գյուղերում, տների պատերը բարակ չեն կառուցում։ Սրանք հարցեր են, որոնց պատասխանները պետք է քննությունը տա։
Փրկված զինծառայողներ կան, որոնք էլ ամեն ինչ կպատմեն։ Հնարավոր չէ ամեն ինչ ծածակադմփոց անել, թեև դա օրվա իշխանությունների ձեռագիրն է»,- ասաց ռազմական փորձագետը։
Մեր զրուցակիցը անտրամաբանական համարեց դեռ ծառայողական քննությունը չավարտված՝ միանգամից պաշտոնանկություններ կատարելը՝ այն էլ սահմանային զորամասում։
«Այդ ո՞նց որոշեցին, որ նրանք արդեն մեղավոր են և պաշտոնից ազատեցին։ Այդ նույն տրամաբանությամբ Նիկոլ Փաշինյանն ամեն Աստծո օր պետք է պաշտոնանկ արվի, էլ չեմ ասում՝ Սուրեն Պապիկյանը։ Ո՞վ է ասում, որ Պաշտպանության նախարարը և ԳՇ պետն իրենց մեղավորության բաժինը չունեն։ Մենք միշտ զգուշացնում էինք, որ սահմանին մեր զավակներն անմարդկային պայմաններում են ծառայում, իսկ Ադրբեջանն իր վերցրած տարածքներում տեսեք՝ ինչ զորմասեր է ստեղծում։ Ի՞նչ է հայկական կողմը չէ՞ր կարող ստեղծել։ Պարգևավճարների, փարթիների, Եվրատեսիլի, տոնածառի վրա մեծ գումարներ կարող են ծախսել։ Առաջնահերթն անվտանգությունը չէ՞։ Այսինքն՝ փողեր լափելու խնդիր կա, և պատասխանատվությունը կոնկրետ միայն հրամանատարինը չէ»,- նշեց մեր զրուցակիցը։
Հայկ Նահապետյանը համոզմունք հայտնեց, որ քանի դեռ ՀՀ իշխանության ղեկին ներկա վարչակազմն է, բանակում նմանօրինակ միջադեպերը շարունակվելու են։
Հիշեցնենք, որ հունվարի 19-ին՝ ժամը 01:30-ի սահմաններում, դեռևս չպարզված հանգամանքներում հրդեհ է բռնկվել Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում:
Նախնական տվյալներով՝ ՊՆ N զորամասի ինժեներասակրավորային վաշտի կացարանում բռնկված հրդեհի հետևանքով զոհվել է 15 զինծառայող, 3 զինծառայողի վիճակը գնահատվում է ծանր:
