Վաղվանից մեկնարկում է ոստիկանական բռնությունների դեմ փաստաբանների բողոքի գործողությունների «3-րդ տրանշը»։ Մենք նախ կատարեցինք իրազեկման ակցիաներ, ապա՝ մեկօրյա գործադուլ (հունիսի 26-ին), իսկ հիմա՝ եռօրյա գործադուլ (հուլիսի 11-ից 13-ը). Azg.am-ը տեղեկանում է իրավապաշտպան Ռուբեն Մելիքյանից։
Նա նշել է. «Փաստում եմ, որ մեր պահանջների մասով որևէ առաջընթաց չի գրանցվել, որևէ ընդառաջ քայլ չի կատարվել, ուստի միանում եմ թե՛ գործադուլին և թե՛ զուգահեռ բողոքի գործողություններին։
Քաղացիներին հիշեցնում եմ, որ պահանջելով պատժել փաստաբանի դեմ բռնություն կատարած ոստիկաններին՝ փաստաբաններն իրականում պայքարում են հենց ձե՛ր իրավունքների համար, քանի որ փաստաբանների նկատմամբ բռնության թե՛ առաջին և թե՛ երկրորդ դեպքերը պայմանավորված են եղել պաշտպանյալների նկատմամբ ծեծը դադարեցնելուն ուղղված փաստաբանների ջանքերով»։
Հիշեցնենք, որ փաստաբանների բողոքի ակցիաները կապված են իրենց գործընկերների նկատմամբ բռնություն կիրառելու փաստերի հետ, ընդ որում՝ փաստաբաններին ծեծողները ոստիկաններ են եղել։ Նրանք մնացել են անպատիժ։
Հուլիսի 11-ին փաստաբանները Փաստաբանների պալատից երթով շարժվելու են Ներքին գործերի նախարարություն՝ ոստիկանապետ Հայկ Հովհաննիսյանի հրաժարականի պահանջով, նրան հանձնելու «Փաստաբանության թշնամի» հավաստագիրը։
