Բաքվում սկսվել է օկուպացված Արցախի Հանրապետության Քարվաճառի շրջանում ապօրինաբար ձերբակալված զինծառայող Գագիկ Աշոտի Ոսկանյանի դատավարությունը։
Նշվում է, որ դատախազն ընթերցել է մեղադրական եզրակացությունը:
Ոսկանյանը մեղադրվում է օգոստոսի 16-ին «Ադրբեջանի պետական սահմանը խախտելու և ահաբեկչական և դիվերսիոն գործողություններ իրականացնելու փորձի» համար։
Կասկած չկա, որ եթե Գագիկ Ոսկանյանի տարիքը համապատասխաներ, ապա նա կմեղադրվեր 1991 թվականին Խոջալուում ադրբեջանցիների «ցեղասպանություն» իրականացնելու մեջ։ Բայց քանի որ նա այդ ժամանակ անգամ ծնված չի եղել, հետևաբար՝ դիվերսիոն գործողություն, ահաբեկչության փորձ։
Ադրբեջանական զլմները գրում են, թե իբր Ադրբեջանի զինված ուժերի զինծառայողները ձերբակալել են դիվերսիոն-հետախուզական խմբի անդամ Գագիկ Ոսկանյանին։ Այնուհետև ադրբեջանական կողմն անցել է իրեն հատուկ զրպարտանքներին՝ իբր ձերբակալության ժամանակ նրա մոտ հայտնաբերվել է մեծ քանակությամբ զենք-զինամթերք։ Զինաթափման ժամանակ նա զինված դիմադրություն է ցույց տվել Ադրբեջանի զինված ուժերի զինծառայողներին և փորձել սպանել նրանց և այլն։
Հիշեցնենք, որ այս տարվա օգոստոսին Ադրբեջանի դատախազությունը հայտնել էր ՀՀ պահեստազորային Գագիկ Ոսկանյանի հետ կապված քրեական գործ հարուցելու և նրան կալանավորելու մասին։ Օգոստոսի 16-ին ՀՀ պաշտպանության նախարարությունը հայտնել էր, որ պահեստազորային Գ. Ո.-ն, նախնական տվյալներով, ինքնակամ թողել է մարտական դիրքը: ՊՆ-ն հերքել էր այն հաղորդագրությունը, թե իբր ՀՀ ԶՈՒ-ն սահմանագոտու արևելյան հատվածում դիվերսիոն ներթափանցման փորձ է կատարել։
