Պնդել, որ միանշանակ սակագինը բարձրանալու է, նման բան այս պահին որևէ մեկը չի կարող ասել, այսօր լրագրողների հետ զրույցում ասաց Հանրային ծառայությունները կարգավորող հանձնաժողովի նախագահ Մեսրոպ Մեսրոպյանը։
«Իհարկե, չեմ բացառում թանկացումը։ Սակագնի թանկացումը կարող էր լինել առանց այս պրոցեսների, որովհետև էլեկտրաէներգիայի սակագինը բազմակոմպոնենտ թիվ է։ Այն կախված է արտարժույթի կուրսից, կախված է տվյալ տարվա փաստացի բալանսներից, որովհետև էլեկտրաէներգիայի արտադրությունը պլանավորվում է, հետո վերջում այլ բան է ստացվում, հազար մի գործոն կա»,-ասաց նա։
Հարցին՝ վերջին անգամ ե՞րբ են Կարապետյանները բարձրացրել սակագինը, Մեսրոպյանը պատասխանեց. «Նախ, էլեկտրաէներգիայի գինը բարձրացնող կամ իջեցնող Կարապետյանները չեն, դա սխալ եզրույթ է, հանձնաժողովն է որոշում։ Հիմա վա՞տ է, որ չենք թանկացրել»։
Դիտարկմանը՝ ՀԷՑ-ը սակագնի բարձրացումը զսպել է, քանի որ վարկ է վերցրել, իսկ ինքը և Ռոմանոս Պետրոսյանն անընդհատ ակնակրկում են թանկացման մասին, Մեսրոպյանն ասաց՝ ինքը որևէ բան չի ակնարկում։
«Դուք ինձ տեսական հարց եք տալիս, ես ձեզ պարտավոր եմ ճշմարտությունն ասել տեսական հարթության մեջ։ Ես չեմ ակնարկում, որ սակագին կբարձրանա։
Այդ հարցն ունի երկու պատասխան՝ այո՛, կարող է բարձրանալ, ո՛չ, չի բարձրանա: Երբ տարվա վերջում Հանձնաժողովը սակագների վերահաշվարկի պրոցեսը սկսում է, այդ ժամանակ է պարզ լինում սակագինը կբարձրանա՞, թե չի բարձրանա: Օդի մեջ մերկապարանոց հայտարարություններ չենք կարող անել»,- հայտարարեց Մեսրոպյանը:
