ՀԷՑ-ում ներդրումների արդյունավետություն, վթարային անջատումների հաճախակի տևողություն, գնումների գործընթաց, այս ամեն ինչը ենթակա են մանրամասն, մանրակրկիտ ուսումնասիրության, որովհետև, վերջին հաշվով, այս ամեն ինչի արդյունքում այդ ընկերության վատ մենեջմենթի, վատ կառավարման հարց է բարձրացվել պետության կողմից։ Այս մասին այսօր լրագրողների հետ զրույցում ասաց Հանրային ծառայությունները կարգավորող հանձնաժողովի նախագահ Մեսրոպ Մեսրոպյանը։
Հարցին՝ խոստանո՞ւմ է, որ եթե պետությունը կառավարի ՀԷՑ-ը, անջատումներ չեն լինի, մարդկանց լվացքի մեքենաները, սառնարանները շարքից դուրս չեն գա, հանձնաժողովի նախագահը պատասխանեց՝ որևէ մեկը նման բան չի կարող խոստանալ։
«Հասարակ կենցաղային օրինակ բերեմ. երբ մենք մեր բնակարանը որոշում ենք վերանորոգել, սկզբից որոշում ենք, որ այն կարժենա X դրամ, կտևի Y ժամանակ և մեզ վրա կնստի այսքան դրամ, բայց դրանից հետո դա ավելի շատ է մեր վրա ֆինանսական առումով նստում, ավելի երկար ժամանակ է տևում, և վերանորոգման ընթացքում էլ տնեցիները կարող են բողոքել, որ այսքան երկար ձգվեց վերանորոգումը։ Դա դեռ չի նշանակում, որ այդ վերանորոգման կարիքը արդարացված չէր։ Ասելիքս այն է, որ անջատումներ, վթարներ միշտ կարող են լինել ընթացքում»,-նշեց Մեսրոպյանը։
