«Արմավիրի թիվ 4 ավագ դպրոցի միավորումը թիվ 1 ավագ դպրոցին» նախագիծը պետք է հետ կանչվի. համոզված է տնօրենի՝ մասնագիտացված կրթական աջակցությունների գծով տեղակալ Լիլիթ Եփրեմյանը:
«Նախագիծը նման բովանդակությամբ չի կարող դրվել քննարկման՝ թերի է, կողմնակալ է և անհեռանկար: Շահագրգիր կողմերի կարծիքն անգամ հաշվի առնված չէ: Իրավաչափ չեն ծանուցման հետ կապված գործողությունները, այսինքն՝ մեզ չեն էլ ծանուցել»,-ասաց փոխտնօրեն Եփրեմյանը:
Դպրոցի փակման գործընթացի վերաբերյալ աշխատակիցներին պարզաբանելու, նրանց հուզող հարցերին պատասխանելու նպատակով երեկ Արմավիրում էր ԿԳՄՍ նախարարի տեղակալ Արաքսիա Սվաջյանը:
«Նա մեզ չլսեց: Հայտնեց նախարարության դիրքորոշումը, իսկ հարցերի ամենահեշտ պատասխանը սա էր՝ կրթության քաղաքականությունը մշակում ենք մենք և որոշողը մենք ենք:
Չեն կարող նման միահեծան որոշումներ կայացնել»,- նշեց Լիլիթ Եփրեմյանը:
Նա վստահեցնում է՝ չեն լռելու, փորձելու են հասնել ավելի մեծ հնչեղության՝ չբացառելով, որ գուցե լինեն բողոքի զանգվածային ակցիաներ:
«Մենք ի սկզբանե բոլորովին այլ տրամադրվածություն ունեինք: Կարծում էինք, որ մեզ հետ կբանակցեն, բայց մադիկ չէին եկել բանակցելու, չէին եկել մեզ լսելու, չէին եկել մեզ ասելու՝ գիտե՞ք ինչ, ամեն դեպքում շնորհակալություն, որ դուք մեր համակարգում այսքան տարի աշխատել եք: Գոնե էդպես: Շատ թելադրող ու շատ ոչ բարյացակամ մթնոլորտ էր: Չարդարացված լավատեսությամբ հավատում ենք, որ գոնե մեզ կլսեն»,- ասաց Լ. Եփրեմյանը:
