Պրահայում 1999 թվականից լույս տեսնող «Օրեր» ամսագրի հիմնադիր խմբագիր Հակոբ Ասատրյանը Հայաստան է եկել «Ապագա հայկական» համաժողովին մասնակցելու։
Շուրջ 24 տարի Հակոբ Ասատրյանը թե՛ «Օրերի», թե՛ հասարակական այլ նախաձեռնությունների միջոցով գործնական կապեր է ստեղծել ու պահպանել Սփյուռքի տարբեր գաղթօջախների ու Հայաստանի միջև, ուսումնասիրել է հայկական համայանքների գործունեությունը, լրագրողի դիտանկյունից բացահայտել հետաքրքիր առանձնահատկությունները, խնդիրները, հեռանկարները։
Аzg.am-ի հարցազրույցը Հակոբ Ասատրյանի հետ «Օրեր» ամսագրի գործունեությունը ներկայացնելու ու հատկապես պարբերականի վերջին համարների լույսընծայման առիթով է։
Հատկանշական է, որ Հակոբ Ասատրյանը «Ազգ» թերթի «հնաբնակ» թղթակիցներից է, որի հոդվածները, հարցազրույցները դեռ 1990-ականներից հայ լրագրության բազմաշերտ ու վերլուծական մտքի դասական, ուսանելի օրինակներ են։ Նոր սերունդը Հակոբ Ասատրյանի և առհասարակ «Ազգի» խմբագրական ու թղթակցական հարուստ նյութերին կարող է ծանոթանալ Azg.am կայքում զետեղված «Ազգի» արխիվում։
Հայաստանից տեղափոխվելով Չեխիա՝ Հակոբ Ասատրյանը տիկնոջ՝ լրագրող Աննա Կարապետյանի հետ, տեղեկատվական սուղ միջոցների պայմաններում ստեղծել է «Կովկաս-Արևելյան Եվրոպա» տեղեկատվական կենտրոնը, որի հիման վրա էլ 1999-ին հրատարակվել է «Օրեր» եվրոպական ամսագիրը։
«Մեր տեսլականն այն էր, որ ամսագիրը ծառայի ոչ միայն չեխահայ համայնքին, այլև դառնա Եվրոպայի հայերի լրատվամիջոցը։ Եվրոպական բոլոր համայնքների մասին տեղեկատվություն ընդգրկելու համար կապեր հաստատեցինք Ֆրանսիայի, Գերմանիայի, Ավստրիայի և եվրոպական այլ երկրների գաղթօջախների հետ։
1000 օրինակով էր հրատարակվում «Օրերը», մենք ոչ մի կուսակցության կամ քաղաքական ուժի չէինք հարում, հետևաբար, ինքներս պետք է հայթայթեինք ամսագիրը տպագրելու միջոցները։ Բայց «Օրերը» մեծ տարածում գտավ. այն ձեռքից ձեռք էր անցնում, մեկը բաժանորդագրվում էր, կարդում, հետո փոխանցում ուրիշներին՝ անգամ այլ երկիր ուղարկելով»,- պատմեց Հակոբ Ասատրյանը։
«Օրերի» վերջին համարներից մեկը մանրամասնորեն ներկայացնում է Երուսաղեմի հայ համայնքի, պատրիարքարանի կյանքը, գործունեությունը, դժվարությունները, մարտահրավերներն ու խնդիրները։
Մանրամասները՝ տեսանյութում.
