Տավշո բնաշխարհ, մայրաքաղաքային խելահեղ վազքից կտրված գողտրիկ անկյուն, համակ լռություն, կյանք ու պատմություն ապրած գյուղական հին տուն. էլ ի՞նչ է պետք երջանիկ լինելու համար, մանավանդ երբ այս հեքիաթ-միջավայրում զբաղվում ես սիրածդ գործով։
Առնակ Ավետիքյանը թողել է բժշկությունը, մայրաքաղաք Երևանն ու տեղափոխվել սկզբում՝ Դիլիջան, հետո՝ Դիլիջանից 26 կմ հեռավորության վրա գտնվող Աղավնավանք գյուղ ու այստեղ ստեղծել մրգօղի թորելու արտադրամաս, համտեսի, հանգստի սրահներ։ Նրա փոքրիկ թագավորության անունը «Դիլվադոս» է, դե մրգօղին էլ, բնականաբար, նույնպես «Դիլվադոս» է՝ հետաքրքիր հապավում։
«Դիլվադոսը» պատրաստվում է բացառապես Տավուշի մրգերից ու պտուղներից։ Տավշո անտառների բարիքն ու այգիների մրգերն են «Դիլվադոսի» հիմքն ու հումքը։
Օղի թորելը հանաք-մասխարություն չէ, լուրջ գիտություն է։ Առնակ Ավետիքյանը խորությամբ, մանրամասնորեն ուսումնասիրել է մրգօղու պատրաստման եղանակներն ու նրբությունները, որպեսզի այն հասցնի բառացիորեն կատարելության։
Մրգօղին հետաքրքրում է և՛ հայ, և՛ օտարազգի զբոսաշրջիկներին։ Հյուրերը գալիս են «Դիլվադոս» հանգստի վայր, համտեսում «Դիլվադոս» մրգօղու տեսակներից, եթե բախտները բերում է գալ հենց օղի թորելու սեզոնին, նաև սեփական աչքերով են տեսնում թորման գործընթացը։
Զբոսաշրջային որոշ ընկերություններ գիտեն «Դիլվադոսի» տեղը, նաև «Դիլվադոս» մրգօղու արժեքն են լավ հասկանում։ Համագործակցությունն ընդալյնվելու հնարավորություն ունի։
Հյուրերը, քեֆները լավ, բնականաբար, ուզում են հենց այստեղ էլ գիշերել, ու եթե անգամ սթափ վիճակում են, ո՞վ կուզենա այստեղից շուտ հեռանալ։
Տավուշի մրգերից ու պտուղնրից պատրաստված «Դիլվադոսի» վաճառքն աստիճանաբար ընդլայնվում է։
Բիզնեսով, սիրած գործով զբաղվելուց բացի, Առնակ Ավետիքյանի մեծագույն ցանկությունն է՝ որակյալ մրգօղի արտադրողնրը շատ լինեն, բարձրորակ մրգօղու արտադրությունն ու կիրառումը դառնա մշակույթ, ինչու ոչ՝ հենց տավուշյա՛ն մշակույթ։
Որակյալ արտադրանքով կարելի է բարձրացնել մրգօղու հեղինակությունն ու մրցունակությունը, այն դարձնել բրենդ, զբոսաշրջության համար գրավիչ բաղադրիչ։
Մրգօղու դասական արտադրությունից բացի, Առնակ Ավետիքյանը երևանաբնակ մի բարմենի հետ նոր փորձարկումներ է անում՝ մրգօղու տեսակների հետ խառնելով Տավուշի ծաղիկները։
Համագործակցություն տեղաբնակների հետ, նոր աշխատատեղեր, գյուղական կյանքի աշխուժացում, զբոսաշրջության զարգացում, փոքր ու միջին բիզնեսի համար նոր խթան, սեփական ուժերը գնահատելու, սեփական ուժերին հավատալո՛ւ նոր լիցքեր, և, իհարկե, համառ աշխատանք։ Արդյունքը՝ «Դիլվադոս» մրգօղին է ու նույն անվամբ հանգստի վայրը։
Այս ամենի մեջ ջանք ու եռանդի իր բաժինն ու նաև Առնակի շունը՝ Սանին։ Մարդու սրտին ու հոգուն դիպչող ամենակարճ ճանապարհը պարզությունն ու անմիջականությունն է, անկեղծությունն ու ազատությունը, կամ ուղղակի երբ ներդաշնակվել ես բնությանը և գիտես, թե ինչ ես ուզում այս կյանքից։
