Պաշտպանության ծախսերը 2018 թվականին կազմել են 245 միլիարդ դրամ, իսկ 2025 թվականին՝ 664 միլիարդ դրամ (1.741 միլիարդ ԱՄՆ դոլար): Այս մասին այսօր կայացած մամուլի ասուլիսի ժամանակ հայտարարեց ՀՀ պաշտպանության նախարար Սուրեն Պապիկյանը:
Նա նշեց, որ պաշտպանության ծախսերը աճել են 1.1 միլիարդ դոլարով։
Ըստ Պապիկյանի՝ 2025 թվականը պետք է համեմատել «նախահեղափոխական 2018 թվականի հետ»՝ այն քննադատությունների ֆոնին, թե պաշտպանության ոլորտին քիչ միջոցներ են հատկացվում։
«Այս թվերը խոսուն են, և ես ուզում եմ, որ սրա վրա ակցենտ դնելով՝ 2025 թվականը համարենք գերարդյունավետ տարի պաշտպանական ոլորտում իրականացվող թե՛ ծախսերի, թե՛ ընդհանուր ոլորտում», – նշեց Պապիկյանը:
Պաշտպանության նախարարը միաժամանակ կարևորեց սպառազինության և ռազմական տեխնիկայի ձեռքբերման շուկաների դիվերսիֆիկացիան՝ միաժամանակ շեշտելով տեղական արտադրության զարգացման անհրաժեշտությունը։
«Շատ կարևոր եմ համարում սպառազինության, ռազմական տեխնիկայի ձեռքբերման, շուկաների դիվերսիֆիկացիան։ Բայց նաև կարևորում եմ տեղական արտադրության զարգացումը»,- ասաց Պապիկյանը։
Նրա խոսքով՝ 2022 թվականին տեղական ռազմարդյունաբերության հետ կնքված պայմանագրերի ընդհանուր ծավալը կազմել է 5.5 մլրդ դրամ, մինչդեռ ներկայում գործող պայմանագրերով այն հասել է 170 մլրդ դրամի, որի մեծ մասն արդեն մատակարարված է։
Պապիկյանը հայտարարեց՝ կառավարության 2026-2028 թվականների եռամյա ծրագրով նախատեսվում է տեղական ռազմարդյունաբերության ոլորտին հատկացնել 150 մլրդ դրամ։
«Սա էական ներդրում եմ համարում»,- շեշտեց Սուրեն Պապիկյանը։
