Մենք պայքարելու ենք, որպեսզի այս կառավարությունը շատ արագ հեռանա։ Միայն այդ ժամանակ կկարողանանք մեր ազգային խնդիրները կարգավորել։ Պետք է պայքարել փողոցով, բոլոր հնարավոր միջոցներով, որոնք հասու են քաղաքական դաշտում՝ մինչև արդյունք գրանցվի, կառավարության առջև արցախահայության բողոքի ակցիայի ժամանակ ասաց Դեմոկրատական կուսակցության նախագահ Արամ Սարգսյանը։
Նրա խոսքով՝ չի կարելի փոքր անհաջողությունից հետո ձեռքերը ծալած նստել և թույլ տալ, որ կառավարությունը շարունակի նույն ոճով։
«Անցած օրը հայտնի անձն ուղղակի ուրացավ և՛ մեր Հռչակագիրը, և՛ մեր ազգային խնդիրները՝ բացահայտ ասելով, որ այդ հռչակագիրն ընդունվել է Խորհրդային Հայաստանի Գերագույն խորհրդի կողմից, և 95 թվականի Սահմանադրության մեջ այլևս այն ուժ չունի։ Հասկանո՞ւմ եք՝ ինչ է ասում այս անիրավ անձը»,- հարց հնչեցրեց քաղաքական գործիչը։
Արամ Սարգսյանը միաժամանակ համոզմունք հայտնեց՝ խաղաղության պայմանագիրը լոկ թղթի կտոր չէ, որ ադրբեջանական կողմը երբ ցանկանա՝ պատռի և ամեն ինչ նորից սկսի։
«Խաղաղության հասնելու ենք միայն այն դեպքում, եթե ուժեղ լինենք, և թշնամին հասկանա, որ մենք պատասխան տալու ենք»,- ասաց նա։
Լրագրողները քաղաքական գործչից նաև հետաքրքրվեցին՝ պաշտոնական Երևանը պե՞տք է մասնակցի Բաքվում կայանալիք COP 29-ին, թե առավել նպատակահարմար է հրաժարվարել մասնակցությունից։
«Եթե պետք է Նիկոլ Փաշինյանը գնա, ավելի լավ է՝ չգնա, որովհետև սրանք ո՛չ քաղաքական կամք ունեն, ո՛չ դիրքորոշում։ Այլ բան է, որ նա գնա և պահանջատեր լինի, բայց մենք գիտենք, որ պահանջատեր չէ»,- ամփոփեց Սարգսյանը։
