Խորհրդային պետական գործիչ Անաստաս Միկոյանը Կրեմլում պաշտոնավարել է 55 տարի։ Նա հակասական, վիճահարույց կերպար է, պատմական անձ, որը հրաշալի կերպով վարել է Խորհրդային Միության արտաքին հարաբերությունները, նրան են վստահվել ամենաբարդ ու խրթին բանակցությունները։
Թեքեյան կենտրոնում տեղի ունեցավ Անաստաս Միկոյանի թոռան՝ կոմպոզիտոր, պրոդյուսեր, երաժիշտ Ստաս Նամինի «Անաստաս Միկոյան. Իլյիչից մինչև Իլյիչ. չորս դարաշրջան՝ մեկ ճակատագիր» փաստագրական դրամայի շնորհանդեսը։ Նամինն իր պապի մասին գիրքը գրել է ռուսերեն, այն հայերեն է թարգմանել պատմական գիտությունների դոկտոր, պրոֆեսոր Խաչատուր Ստեփանյանը։
Ստաս Նամինը 6 տարի իր պապին վերաբերող փաստաթղթեր ու վկայություններ է փնտրել տարբեր արխիվներում, որպեսզի նրա գործունեությունը ներկայացնի բացառապես փաստաթղթերով, պատմական վկայություններով հիմնավորված։
Անաստաս Միկոյանը, 55 տարի ծառայելով խորհրդային կառավարությունում, մեծ հեղինակություն է ձեռք բերել թե՛ կայսրության ներսում, թե՛ նրա սահմաններից դուրս։
Ստաս Նամինն իր պապի մասին նաև ֆիլմեր է նկարահանել՝ դարձյալ փաստերով հիմնավորված ներկայացնելով Միկոյանի կյանքի ու գործունեության իրական պատմությունը, փակելով նրան վերագրվող կասկածելի, հորինված պատմությունների էջը։ Այս գրքով ու ֆիլմերով նա մերկացնում է Լեոնիդ Բրեժնևի՝ Միկոյանի մասին տարածած զրպարտությունները։
«Անաստաս Միկոյան. Իլյիչից մինչև Իլյիչ» ժողովածուի վրենագիրն էլ հումորային է՝ ցույց է տալիս այն ժամանակահատվածը, որն ապրել է Միկոյանը՝ Վլադիմիր Իլյիչ Լենինից մինչև Լեոնիդ Իլյիչ Բրեժնև։
Ո՞վ կմտածեր, որ Լոռվա Սանահին գյուղում ծնված Անաստատ Միկոյանը մի օր կդառնա Խորհրդային կառավարության ամենածանրահշիռ դեմքերից մեկը ու կվերածվի լեգենդի։
Անաստաս Միկոյանի կյանքն ու գործունեությունը բացառապես արխիվային փաստաթղթերով ներկայացնող ժողովածուի հայերեն թարգմանությունը տպագրվել է 500 օրինակով։ Այն չի կարող բոլոր հարցերի պատասխանները տալ, բայց համակողմանիրեն պատմում է Անաստաս Միկոյան պետական գործչի, դիվանագետի՝ դժվարին, վտանգավոր ու խութերով լի ճանապարհի մասին։
