Արցախցիների հանդեպ խտրականություն կա. Մարդու իրավունքների պաշտպանության, Ցեղասպանության կանխարգելման միջազգային օրվան նվիրված համաժողովին իր ելույթն այսպես սկսեց փաստաբան Հովհաննես Խուդոյանը։
Հիմա քաղաքական ենթատեքստով խտրականություն ու ատելություն է գեներացվում արցախցիների նկատմամբ։ Եվ սարսափելին այն է, որ այդպիսի վերաբերմունք, տրամադրվածություն կա Հայաստանում, այնտեղ, որտեղ Հայրենիք, տունտեղ, նախնիների ու իրենց զավակների գերեզմանները կորցրած արցախցիներն են ապաստանել։
Բարեբեխտաբար, սա համընդհանուր վարքագիծ չէ։ Շատերը ապրումակցում են մեր հայրենակիցներին, օգնության ձեռք մեկնում։
«Երթևեկության մեջ մեքենա վարող արցախցիները եթե աննշան խախտում են կատարում, վարորդն ասում է՝ ղարաբաղցիները մեր երթևեկությանը չեն ենթարկվում։ Մյուս դեպքում նույն երևույթի մասին մեկ այլ վարորդ ասում է՝ արցախցիները դեռ չեն վարժվել մեր երթևեկությանը. սա արդեն դրական վերաբերմունք է։
Արցախցիների նկատմամբ կոպիտ վերաբերմունք է դրևորվել նաև ոստիկանական բաժանմունքում։ Հովհաննես Խուդոյանն ասաց, որ հետևողական են լինելու, որպեսզի իրավապահ համակարգի աշխատողները պատասխանատվության ենթարկվեն։
«Մի երևույթ էլ կա՝ արցախցիները պետք է շնորհակալ լինեն Հայաստանին՝ լսում ենք տարբեր կողմերից։ Ընդհակառակը՝ մենք պետք է շնորհակալ լինենք արցախցիներին, որովհետև նրանք 10 ամիս շրջափակման մեջ գտնվելով՝ պաշտպանեցին Հայաստանը։ Եվ այսօր հասկացողը հասկանում է, որ Արցախը կորցնելով՝ վտանգված է Հայաստանը։
Ամենակարևոր խնդիրներից մեկը՝ արցախցիներին մեկ օրում զրկելով ՀՀ քաղաքացիությունից՝ նրանք մինչև 2026 թվականը զրկված են լինելու ակտիվ ընտրական իրավունքից, չեն կարող նաև առաջադրվել որպես պատգամավոր։ Նրանց նաև քաղաքական իրավունքներից զրկելու գործընթաց է սկսվել»,-փաստեց Հովհաննես Խուդոյանը։
