Համատարած կարծիք կա, թե արցախցիները բոլորն ունևոր են։ Մարդու իրավունքների պաշտպանության, Ցեղասպանության կանխարգելման միջազգային օրվան նվիրված համաժողովին Արցախի ՄԻՊ Գեղամ Ստեփանյանն արցախցիների նկատմամբ թյուր ընմբռնումների դեպքերը մատնանշելով՝ առանձնացրեց նաև Հայաստանում նրանց ֆինանսական կարողությունների մասին ուռճացված, երևակայական պատկերացումները։
Նրան անգամ հարցրել են՝ ճի՞շտ է, որ Արցախում գլխավոր մասնագետը 500 հազար աշխատավարձ է ստացել։
«Նման բան չկա։ Սա ևս սխալ պատկերացում է։ Երևի այդ պատճառով էլ արցախցիներին վարձով տները թանկ գներով են տալիս՝ կարծելով թե նրանք «ունևոր են»։
Ասում են, թե արցախցիները չեն կռվել, չեն պայքարել։ Սուտ է։ Ուժերի անհավասար պայմաններում արցախցիները պայքարել են, կռվել»,- հավաստիացրեց Գեղամ Ստեփանյանը։
Արցախցիների նկատմամբ կա խտրականություն, բայց նա կոչ արեց չտրվել շրջանառվող խոսկցություններին։ Սոցիալական ծառայությունների հերթերի ժամանակ կարող է լինել անբարյացակամ վերաբերմունք, բայց դա համընդհանուր բնույթ չի կրում։
Դպրոցներ կան, որտեղ արցախցի երեխաներին լավ չեն ընդունում, բայց մեկ այլ դպրոցում էլ Արցախի բարբառով ցերեկույթ է կազմակերպվում։
