Հայաստանում իշխանության եկած խումբն, իհարկե, ամեն կերպ փորձում է լռեցնել արցախցիների ձայնը. սկզբում հանձնեցին Արցախը, հայ ժողովրդին բերեցին ևս մեկ պարտության, հետո դրա դեմ ոչինչ չստացան և հիմա փորձում են լռեցնել արցախցիներին՝ անգամ չբարձրացնելով նրանց՝ Արցախ վերադարձի հարցը։ Azg.am-ի թղթակցի հետ զրույցում այս մասին ասաց քաղաքագետ Արթուր Խաչիկյանը՝ անդրադառնալով Արցախի նախագահ Սամվել Շահրամանյանի շուրջ վերջին օրերի զարգացումներին։
Հիշեցնենք, որ վերջինս երեկ Հակակոռուպցիոն կոմիտեի կողմից հարցաքննության էր հրավիրել։ Բացի այդ՝ դիմակավորված անձինք երկու օր առաջ քաղաքացիական մեքենայով կանգնեցրել էին Սամվել Շահրամանյանի մոտ հասարակական հիմունքներով աշխատող թիկնազորի աշխատակից Աշոտ Դանելյանին, ձեռնաշղթաներ հագցրել և իր իսկ մեքենայով տարել անհայտ ուղղությամբ։
«ՀՀ իշխանություններն արցախցիների հարցով անգամ մինիմալ պահանջներ չեն բարձրացնում։ Դա պարզից էլ պարզ է։ Գուցեև հնարավոր է՝ մի օր արցախցիները բողոքի ձայն բարձրացնեն, բայց չպետք է մոռանալ, որ նրանց մի մասն արդեն իսկ հեռացել է Հայաստանից, մեծ մասն էլ, հնարավոր է, աշխատանք չգտնելու և այլ պատճառներով առաջիկայում հեռանա»,- նշեց Արթուր Խաչիկյանը։
Քաղաքագետը չբացառեց, որ արցախցիների շրջանում ինչ-որ պահի պրոտեստային տրամադրություններ հասունանան, և որոշակի խմբեր ՀՀ իշխանություններին կոնկրետ պահանջներ ուղղեն։
«Բայց մյուս կողմից մեր ժողովուրդը հոգնել է բողոքելուց։ Մենք անընդհատ բողոքում ենք, սակայն, ցավոք սրտի, ոչ մի բան չի փոխվում. մարդ չունենք, որ այդ բողոքն իր հետևից տանի։ Մենք այնպիսի ընդդիմություն չունենք, որը կկարողանա այդ բողոքներն ուղղել ճիշտ ուղղությամբ։
Ինչ վերաբերում է Սամվել Շահրամանյանին, ՀՀ իշխանությունները միշտ էլ կփորձեն լռեցնել նրան։ Երբ Արցախի անկումը տեղի ունեցավ, և Երևանում բողոքի ակցիաներ սկսվեցին, ՀՀ իշխանությունները բավականին կոշտ արձագանքեցին, այս խմբի ղեկավարը շատ անընդունելի լեզու օգտագործեց, արցախցի ուսանողների վրա հարձակումներ եղան»,- հիշեցրեց մերև զրուցակիցը։
Հիշեցնենք, որ իր թիկնապահի մեքենայում հայտնաբերված թմրանյութի մասին խոսելիս Շահրամանյանը նշել էր.
«Կխնդրեի պատասխանատու ուժային մարմիններին` շատ կարճ ժամանակահատվածում լուծել Աշոտ Դանիելյանին ազատ արձակելու հարցը, քանի որ այդ գործը շինծու է: Բոլորս ականատես ենք եղել դրան։ Մեծ հարցեր է առաջացնում նաև այդ ձերբակալության օրինաչափությունը` 20 հոգով, դիմակավորված, քաղաքի կենտրոնում ձերբակալել անձի, որը կապ ունի Արցախի ղեկավարի հետ և ձերբակալել նրան նախագահին սպասարկող մեքենայի միջից, կարծում եմ, որ բազմաթիվ հարցերի տեղիք է տալիս, և մենք առաջիկայում կստանանք այդ հարցերի պատասխանները։
Այս ամենը կապ ունի նրա հետ, որ փորձում են այն ամենը, ինչ կապված է Արցախի հետ, «կափարիչ» դնել դրա վրա և փակել այդ հարցը, բայց պետք չէ գնալ այդ ճանապարհով, պետք է գտնվեն լուծումներ` Արցախի խնդրի, արցախցիների խնդիրների լուծման համար։ Իմ կարծիքով, եթե այդ հարցը չստանա արդարացի լուծում, մենք ունենալու ենք այս բաց վերքը և այն միշտ արյունահոսելու է»։
