Երբ անդրադառնում ենք առկա գործընթացներին, յուրաքանչյուր գիտակից և արցախյան իրողություններին տեղյակ մարդու մոտ բավական հակասական զգացողություններ են առաջանում, որովհետև միանգամայն ակնհայտ է դառնում, որ ՀՀ գործող իշխանությունն ամենահանցավոր կերպով ուրանում է ՀՀ ներկայիս պետականության հիմքում ընկած Արցախյան հիմնախնդիրը։ Azg.am-ի թղթակցի հետ զրույցում նման տեսակետ հայտնեց քաղաքագետ Ալեքսանդր Քանանյանը։
«Ներկա կառավարության կողմից Արցախի նկատմամբ գործած և գործվելիք հանցագործություններն իրենց ծանրությամբ դեպի երկինք են աղաղակում՝ պահանջելով ամենդաժան և ամանաարդար վրեժխնդրություն։ Մյուս կողմից ԱՀ նախագահ Սամվել Շահրամանյանը արցախյան ոչ այն է կլանի, ոչ այն է՝ վարչական իրողության մի «винтик»-ն է (պտուտակ՝ խմբ.), որը նույնպես պատասխանատվություն է կրում։
Նա առնվազն պետք է պատասխան տա, թե ինչ են եղել այն գումարները, որոնք Երևանից փոխանցվել են 2023 թվականին՝ Արցախում թոշակներ, մանկական նպաստներ տալու համար։ Այսինքն՝ կան չափազանց շատ ֆինանսատնտեսական չարաշահումների ոլորտին վերաբերող հարցեր, որոնք պետք է ուղիղ դրվեն Շահրամանյանի առջև, և նա պետք է քրեական պատասխանատվություն կրի այդ խնդիրների մասին իմանալով հանդերձ՝ կոծկելու համար»,- ասաց Ալեքսանդր Քանանյանը՝ նշելով, որ Արցախի բյուջեի մսխման համար պատասխանատվության պետք է կանչվեն նաև ԱՀ նախկին բոլոր նախագահները՝ առավել մեծ չափով՝ Արայիկ Հարությունյանը։
Քաղաքագետը շեշտեց՝ Սամվել Շահրամանյանը քաջատեղյակ է Արցախի անկման վերջին օրերին կատարված իրադարձություններին և պետք է ստիպված լինի հայտնել բազմաթիվ չարաշահումների մասին։
«Այլ բան է, որ ներկա հակահայ և դավաճանական իշխանության օրոք հերթական անգամ չբացահայտվող դրվագներ են լինելու, և մենք որևէ արդյունք, հատկապես վերոնշյալ գումարների վերահայտնաբերման մասով, չենք ունենալու։
Իհարկե, մենք չենք կարող բացառել, որ Սամվել Շահրամանյանին հարցաքննության կանչելը նաև արցախցիներին կամ Արցախի նախկին վերնախավին ահաբեկելու հերթական դրվագ կարող է լինել»,- ասաց մեր զրուցակիցը։
Հիշեցնենք, որ ԱՀ նախագահը երեկ Հակակոռուպցիոն կոմիտեի կողմից հարցաքննության էր հրավիրել։ Բացի այդ՝ դիմակավորված անձինք երկու օր առաջ քաղաքացիական մեքենայով կանգնեցրել էին Սամվել Շահրամանյանի մոտ հասարակական հիմունքներով աշխատող թիկնազորի աշխատակից Աշոտ Դանելյանին, ձեռնաշղթաներ հագցրել և իր իսկ մեքենայով տարել անհայտ ուղղությամբ։
Արդեն այսօր Շահրամանյանը լրագրողների հետ զրույցում նշել էր. «Այն ամենը, ինչ կապված է Արցախի հետ, փորձում են «կափարիչ» դնել դրա վրա և փակել այդ հարցը, բայց պետք չէ գնալ այդ ճանապարհով, պետք է գտնվեն լուծումներ` Արցախի խնդրի, արցախցիների խնդիրների լուծման համար։ Իմ կարծիքով, եթե այդ հարցը չստանա արդարացի լուծում, մենք ունենալու ենք այս բաց վերքը և այն միշտ արյունահոսելու է»։
