Ներկա փուլում հայ-ռուսական հարաբերությունները գնահատելը շատ դժվար է և նույնիսկ սխալ։ Պատճառն այն է, որ միջազգային կարգը փլուզվել է, և նոր կարգ ձևավորելու գործընթաց է գնում, Azg.am-ի թղթակցի հետ զրույցում ասաց վերլուծաբան Ստեփան Դանիելյանը՝ հավելոլվ, որ պատերազմական փուլում յուրաքանչյուր երկիր առաջին հերթին մտածում է իր շահերի մասին։
«Ես աշխատում եմ չօգտագործել «դաշնակցություն» բառը, որովհետև պետություններն առաջնորդվում են իրենց շահերով, և այդ շահերը ժամանակավորապես համընկնում են այլ պետության շահերի հետ, ըստ այդմ՝ դաշնակցային հարաբերություններ են ստեղծվում։
Այդ առումով Հայաստանը պետք է գնահատի, թե ինչ խնդիրներ ունի Ռուսաստանը, ինչ խնդիրներ ունի հենց ինքը։ Այս պարագայում տեսնում ենք, որ շատ բարդ խնդրի առջև ենք հայտնվել, որովհետև 2020 թվականի պատերազմով ենք անցել։ Ծանրագույն պատերազմով է անցնում նաև Ռուսաստանը, ընդ որում ոչ թե միայն Ուկրաինայի, այլ Արևմուտքի դեմ։ Սրան գումարած՝ ՌԴ-ն նաև տնտեսական շրջափակամն մեջ է, փակ են դեպի Եվրոպա ճանապարհները»,- ասաց վերլուծաբանը։
Ստեփան Դանիելյանի խոսքով՝ այժմ արդեն փորձ է արվում Ռուսաստանը շրջափակել հարավից։
Մեր զրուցակիցն ընդգծեց՝ տեղի ունեցող աշխարհաքաղաքական ֆունդամենտալ փոփոխությունների ֆոնին հայ-ռուսական հարաբերությունների մասին դատողություններ անելն իսկապես դժվար է, նախ, որովհետև ինքը՝ Ռուսաստանը չգիտի, թե ինչ քաղաքականություն է վարելու Հարավային Կովկասում։
«Անհայտ է, թե ինչ ուղղությամբ է գնալու Իրանը։ Մենք տեսնում ենք, որ Իրան-ԱՄՆ որոշակի ջերմացում է նկատվում, բայց թե այն ուր կտանի, կազդի՞ ռուս-իրանական հարաբերությունների վրա, անհայտ է։
Կամ տեսնում ենք, որ Ադրբեջանը երկընտրանքի առջև է՝ միանալ ռուս-իրանական ճանապարհին, թե ընտրել թուրք-ադրբեջանական՝ դեպի Միջին Ասիայի ճանապարհը։ Այս ամենը վերաբերում է մեզ, և մենք պետք է ծանրագույն որշումներ ընդունենք։ Հայաստանի՝ որոշում չկայացնելն ազդում է հայ-ռուսական հարաբերությունների վրա, Ռուսաստանի՝ Հարավային Կովկասում քաղաքականության չհստակեցումն իր հերթին ազդում է ռուս-հայկական հարաբերությունների վրա։ Ահա այս անորոշ ժամանակաշրջանի պատճառով հնարավոր չէ գնահատել ռուս-հայկական հարաբերությունները»,- ասաց Դանիելյանը։
Անդրադառնալով օրեր առաջ ՀՀ վարչապետի այն հայտարարությանը, որ Ուկրաինայի դեմ պատերազմում Հայաստանը Ռուսաստանի դաշնակիցը չէ, վերլուծաբանն այն առնվազն անհասկանալի որակեց։ Դանիելյանի համոզմամբ՝ նման հայտարարություն առհասարակ պետք չէր անել, որովհետև առանց այդ էլ՝ պարզ է՝ Ուկրաինայի դեմ պատերազմը ոչ մի կերպ չի կարող Հայաստանինը լինել։
