Ե՛վ հայկական, և՛ թուրքական կողմերից առկա են ազդակներ, որոնք թույլ են տալիս ենթադրելու՝ նախկինում ձեռք բերված պայմանավորվածությունների շրջանակներում հայ-թուրքական սահմանn իսկապես կարող է բացվել, Azg.am-ի թղթակցի հետ զրույցում ասաց թուրքագետ Նելլի Մինասյանը՝ անդրադառնալով ՀՀ վարչապետի՝ այսօր ԱԺ-ում արած այն հայտարարությանը, որ Հայաստանի և Թուրքիայի միջև բնականոն հարաբերություններ հաստատելու մեծ հնարավորություն կա, և ինքը հույս ունի, որ հայ-թուրքական սահմանն առաջիկայում կբացվի։
Ըստ մեր զրուցակցի՝ արդեն իսկ դրական է, որ պայմանավորվածություն կա այս ամռան սկզբից հայ-թուրքական սահմանը բացել երրորդ երկրների քաղաքացիների և դիվանագիտական անձնագիր ունեցող անձանց համար։
«Իմ կարծիքով՝ սա արդեն իսկ կարելի է դրական քայլ համարել, որը գուցե տանի այլ քայլերի շղթայի։ Շուտով զբոսաշրջային սեզոնն է բացվում, բայց օրինակ՝ եթե ռուս զբոսաշրջիկները կարողանան մեր սահմանով անցնել Թուրքիա, մի փոքր անտրամաբանական կլինի, եթե հայ զբոսաշրջիկները շարունակեն Թուրքիա գնալ Վրաստանի տարածքով։
Կարծում եմ՝ պետք է սպասենք այս խնդիրների հետ կապված օրենսդրական կարգավորումների»,- ասաց Նելլի Մինասյանը․
Ըստ թուրքագետի՝ զբոսաշրջության ոլորտը պատահաբար չի մատնանշվել, որովհետև այն եկամուտներ է ապահովում հավասարապես երկու կողմերի համար էլ։
«Մենք գիտենք, թե ինչ կարևոր դեր ունի զբոսաշրջությունը Թուրքիայի համար, և մանավանդ այժմյան սանկցիաների և տարածաշրջանային զարգացումների պայմաններում սա շատ ձեռնտու տարբերակ է։ Բայց ուզում եմ շեշտել, որ սա չի նշանակում դիվանագիտական հարաբերությունների ամբողջական կարգավորում։ Խոսքն, ամեն դեպքում, սահմանափակ ռեժիմի մասին»,- ասաց Նելլի Մինասյանը։
Հիշեցնենք, որ Նիկոլ Փաշինյանը, խոսելով հայ-թուրքական հարաբերությունների կարգավորման գործընթացից, ԱԺ ամբիոնից այսօր հայտարարել էր.
«Այդ հնարավորությունը մեծացել է վերդիվանագիտական և վերքաղաքական գործոնների` մարդկային արժեքների շնորհիվ, այն բանից հետո, երբ մենք որոշեցինք մարդկային, հարեւանային արժեքների վրա հիմնված տրամաբանությամբ արձագանքել Թուրքիայում տեղի ունեցած աղետալի երկրաշարժին»։
