Քանի որ ես եղել եմ Արցախյան շարժման ակունքներում և մասնակցել եմ նաև առաջին պատերազմին, հստակ տեսնում եմ, որ Ադրբեջանն այսօր էլ կիրառում է նույն գործիքակազմը՝ արցախահայությանը տեռորի ենթարկելով, մարդկանց կամքը կոտրելով՝ ի վերջո հասնելու նրան, որ կամ արցախցիները համաձայնեն լինել Ադրբեջանի կազմում կամ թողնեն-հեռանան, Azg.am-ի թղթակցի հետ զրույցում ասաց Արցախյան շարժման ակտիվիստ, արցախցի Բորիս Առուշանյանը։
«Երկրորդ նպատակը, որ ադրբեջանցիները հետապնդում են, ճնշումն է ՀՀ իշխանությունների վրա, որպեսզի վերջիններս ստիպված գնան սրացման։ Իսկ Ադրբեջանը, գերագնահատելով իր ուժերը, գիտի, որ այդ դեպքում Հայաստանը պարտություն է կրելու, քանի որ ՀՀ դաշնակիցները՝ Ռուսաստանը և ՀԱՊԿ մյուս պետությունները, խուսափում են թուրքական պետությունների հետ առճակատումից»,- ասաց մեր զրուցակիցը։
Բորիս Առուշանյանի համոզմամբ՝ եթե հայկական կողմը քայլ առ քայլ զիջի, ինչպես զիջում է նոյեմբերի 9-ի եռակողմ հայտարարությունից հետո, պետք է պատրաստ լինի բարդագույն նոր իրավիճակների։
«Զիջել ենք Հադրութի շրջանի Խծաբերդ գյուղի մասով, Փառուխի, Բերձորի և Աղավնոյի մասով, հիմա էլ Ադրբեջանը հաջորդ քայլն է անում։ Բնականաբար, մեր զիջումների արդյունքում ադրբեջանցիներն ավելի են խստացնելու իրենց ճնշումները։ Պետք է կանգնել, այլևս մեկ քայլ անգամ, կես քայլ անգամ չզիջել։
Եթե պետք է կռվել, ուրեմն պետք է կռվել, ուրեմն դա է մեր ճակատագիրը, որովհետև Ադրբեջանը չի կանգնելու, չի զիջելու իր նպատակները։
Եթե ՀՀ իշխանություններին թվում է, թե Արցախից հրաժարվելով՝ կարողանալու են ստեղծված իրավիճակից դուրս գալ, սխալվում են։ Ուրեմն նրանք լավ չեն ճանաչում ո՛չ ադրբեջանցիներին, ո՛չ թուրքերին։ Մեր քաղաքական միտքը չի ուզում հասկանալ, որ քանի դեռ կա Հայկական հարցը, թուրքերն ու ադրբեջանցիները Հայաստանին հանգիստ չեն տալու։ Միայն այն ժամանակ կարող են հանգիստ տալ, երբ հայկական պետությունը հնարավորություն չունենա զարգանալու՝ կտրված լինելով արտաքին աշխարհից»,- ամփոփեց մեր զրուցակիցը։
